ԵՐԵՎԱՆ, 3 ապրիլի — Sputnik. Հայաստանի ռեստորաններում գրեթե երբեք չեն ստուգվում գազաբալոնները, Sputnik Արմենիայի թղթակցին ասաց «Ավտոգազ» ասոցիացիայի նախագահ Մկրտիչ Տիգրանյանը։
Երեկ Երևանի կենտրոնում գտնվող King Burger արագ սննդի կետում պայթյուն է տեղի ունեցել, տուժել են 8 մարդ, որոնց թվում երեխաներ կան։ Նախնական տվյալների համաձայն` պայթել է ածխաթթվային գազով բալոնը, որը կարգավորում է ճնշումը գարեջրի համար նախատեսված տարաներում։
Գազաբալոնների հետ կապված խնդիրների մասին ավելի վաղ հայտնել էին և՛ ԱԻՆ ներկայացուցիչները, և՛ ՀՀ վարչապետ Կարեն Կարապետյանը։ Սակայն այն ժամանակ խոսքը միայն ավտոմեքենայի համար նախատեսված բալոնների մասին էր։
Իսկ անվտանգության պահանջները գործում են ճնշման տակ գտնվող ցանկացած բալոնի համար։ Դրանք պետք է ստուգել յուրաքանչյուր երկու տարին մեկ։
«Սակայն ոչ ոք այդպես չի անում հասարակական սննդի կետերում և գրեթե ոչ ոք գազավորված ըմպելիքների արտադրողների շարքում, բայց չէ՞ որ այնտեղ ևս ածխաթթվային գազ են կիրառում», — ասաց Տիգրանյանը։
Նա ընդգծեց` ոչ մի լցակայան չպետք է ընդունի այնպիսի բալոններ, որոնք տեխզննման կտրոն չունեն։ Դա վերաբերում է և՛ ավտոմեքենայի համար նախատեսված բալոնների լիցքավորմանը, և՛ թթվածնի և ածխաթթվային գազի լիցքավորմանը։
Երևանի կենտրոնում տեղի ունեցած պայթյունի հետևանքով տուժածներից 6-ը դեռ «Գրիգոր Լուսավորիչ» բժշկական կենտրոնում են։ Այս պահին 8 տարեկան աղջկա վիճակը գնահատվում է ծանր, բայց կյանքին վտանգ չի սպառնում։ Երեկ ուշ երեկոյան նրան վիրահատել են։ Մյուսների կյանքին նույնպես վտանգ չի սպառնում։