ԵՐԵՎԱՆ, 3 ապրիլի — Sputnik. Հայաստանի իրավապահներն առաջինն են, ում հետ Ռուսաստանը կիսում է նոր մշակումները։ Այս մասին Երևանում անցկացված պաշտպանական տեխնոլոգիաների «ArmHiTec-2018» միջազգային ցուցահանդեսի ժամանակ Sputnik Արմենիայի թղթակցին հայտնեց «Կիրառական քիմիա գիտահետազոտական ինստիտուտ (ԳՀԻ)» դաշնային կենտրոնի մարքեթինգի գծով տնօրեն Արտյոմ Մուրանովը։
Ռուսական ԳՀԻ-ն ցուցահանդեսին ներկայացրել էր քաջ հայտնի «Օսա» տրավմատիկ ատրճանակն ու նոր մշակումը։
«Օսան» միավորում է ոչ մահացու գործողությունների հիմնական միջոցները։
«Բազմաֆունկցիոնալության առումով այն նմանը չունի։ Ե՛վ ԱՄՆ-ն, և՛ Եվրամիությունը, և՛ Մերձավոր Արևելքը, և՛ Իսրայելը. բոլորը մեր համակարգն են կիրառում», — ասաց Մուրանովը։
Այդ ատրճանակները կիրառում է նաև ոստիկանությունը ԱՄՆ-ի երկու նահանգներում։
«Ամեն ինչ ճիշտ է, այդպես էլ կա։ Արդեն երկու տարի», — հաստատեց Մուրանովը։
Այդ զենքի նմուշներ է ձեռք բերել նաև ՀՀ ոստիկանությունը։
Ատրճանակը կարող է նախնական մոտ 140 մետր/վայրկյան արագությամբ ռետինե փամփուշտներ արձակել։ Մեկ մետր հեռավորության վրա փամփուշտի հարվածի էներգիան 110 ջոուլ է (նման ուժգնության հարվածներ է հասցնում պրոֆեսիոնալ ծանրամարտիկ-բռնցքամարտիկը)։ Լուսաձայնային փամփուշտը բավականին վառ լուսարձակում է իրականացնում (մոտ 4 մլն կանդելա) և մինչև 145 դեցիբել ձայն արձակում։ Մարդը դրանից շոկ է ապրում և մինչև կես րոպե ոչինչ չի կարողանում անել։
ԳՀԻ-ն նաև նոր մշակում է ներկայացրել, որը դեռ նույնիսկ Ռոսգվարդիայի սպառազինության կազմը չի համալրել։ Դա կրակելու ֆունկցիայով ոստիկանական վահան է, որում 12 փամփուշտի համար պահունակ է տեղադրված և երկու նշանառության սարք` հիմնական, լազերային և պահուստային` բաց (անցքով)։
Յուրաքանչյուր չորս փամփուշտի համար կրակելու մեկ կոճակ կա։ Այսինքն պահունակը կարելի է լիցքավորել «չորսը երեք» տարբեր միջոցներով. օրինակ` գազային, ռետինե և լուսաձայնային փամփուշտներով։
«Բացի այդ, կարելի է ամբողջ պահունակը լիցքավորել տրավմատիկ փամփուշտներով և կրակել մոտ հեռավորությունից` 12 կրակահերթով։ Սա կարելի է կիրառել զանգվածային անկարգությունների դեպքում», — նկատեց Մուրանովը։
Նոր զենքը ստեղծել են` վերլուծելով Կիևում իշխանությունը զավթելու իրադարձությունները։
Երևանում մարտի 29-31-ն անցկացվեց պաշտպանական տեխնոլոգիաների «ArmHiTec-2018» միջազգային երկրորդ ցուցահանդեսը։ Բացի հայկական ընկերություններից, ցուցահանդեսին մասնակցում էին 30 ընկերություններ 14 երկրից, այդ թվում` ռուսաստանյան «Ռոսոբորոնէքսպորտ», «Կոնցեռն ՎԿՈ », «Ալմազ-Անտեյ», «Տեխմաշ», «Պրիբոր», «Ուրալվագոնզավոդ», «ՌՍԿ «ՄԻԳ» բաժնետիրական ընկերությունները։