ԵՐԵՎԱՆ, 1 ապրիլի — Sputnik. Մրցարշավների հայտնի սիրահար Մառա Բաղդասարյանը հաղորդել է, որ վարորդական իրավունքի վկայական է ստացել։ Instagram-ի իր էջում Բաղդասարյանը տեղադրել է վկայականի լուսանկարը, որը, ինչպես նա պնդում է, վերադարձրել են իրեն։
«Վերջապես վերադարձրել են վկայականը, հուսով եմ, որ այլևս նման բան չի կրկնվի», — գրել է «ոսկե երիտասարդության» ներկայացուցիչը՝ հրապարակելով Մառա Բաղդասարյանի անունով վարորդական իրավունքի լուսանկարը։
Ավելի ուշ լուսանկարը հեռացվել է։ Որոշ ԶԼՄ-ներ ենթադրել են, որ դա ապրիլմեկյան կատակ է եղել։
Փաստաբան Ալյոնա Գոռնակը «360»-ի հետ զրույցում նշել է, որ չի քննարկում կեղծ լուրերի կամ ապրիլմեկյան կատակների թեման, բայց ընդգծել է, որ օրենքի տեսանկյունից Մառան իրավունք ունի ստանալ վարորդական իրավունքի վկայականը։
Մեկ օր առաջ Մոսկվայի Լենինգրադյան պողոտայում ճանապարհային ոստիկանության աշխատակիցները բերման են ենթարկել Մառա Բաղդասարյանին։ Ներքին գործերի գլխավոր վարչության մամուլի ծառայության տվյալների համաձայն` ցմահ վարորդական իրավունքից զրկած աղջկան հայտնաբերել են Mercedes մակնիշի ավտոմեքենա վարելիս։ Աղջիկը հրաժարվել է վարորդական իրավունք ներկայացնել։
Հիշեցնենք, որ Մառա Բաղդասարյանը 2016 թվականի մայիսին հայտնի էր դարձել որպես Gelandewagen-ով սկանդալային մրցավազքի մասնակից։ Նրան ձերբակալել էին 2016 թվականի նոյեմբերին Մոսկվայի Լենինյան պողոտայում։ Mercedes-ով մրցավազքը, որը քրեական գործ հարուցելու պատճառ էր դարձել, «Լուկոյլ» ընկերության փոխնախագահի որդի Ռուսլան Շամսուարովն ու նրա ընկերներն իրականացրել էին 2016 թվականի մայիսին, ընդ որում իրենց արկածները հեռարձակել էին համացանցում։ Որոշ տվյալների համաձայն` Մառա Բաղդասարյանը Շամսուարովի ընկերուհին է։
Մառա Բաղդասարյանը մի քանի տասնյակ ՃՏՊ-ների մասնակից է։ 2015 թվականին նա իր ընկերների հետ եղել է BMW-ի մեջ, որը դուրս է եկել հանդիպակաց գոտի և մեծ բախվել Range Rover-ին։ Վթարի հետո 2 մարդ մահացել էին, իսկ Բաղդասարյանը կոմայի մեջ էր հայտնվել։
2017 թվականի մարտին Մոսկվայի Սավելովսկի դատարանը Բաղդասարյանին զրկել էր մեքենա վարելու իրավունքից, հուլիսին դատապարտել էր 600 ժամ ուղղիչ աշխատանքների։