ԵՐԵՎԱՆ, 30 մարտի — Sputnik. «Հայփոստ» ՓԲԸ-ի հաշվեկշռում հաշվառված ավտոմեքենան այսօր՝ մարտի 30-ին, վթարի է ենթարկվել Արագածոտնի մարզում։ Այս մասին հայտնում է shamshyan.com-ը։
Ժամը 13։00-ի սահմաններում Աշտարակ քաղաքի բնակիչ՝ 51-ամյա Սարգիս Ս.-ն իր վարած Volkswagen մակնիշի ավտոմեքենայով Թալին քաղաքից դեպի Թաթուլ գյուղ ավտոճանապարհի 3-րդ կմ հատվածում դուրս է եկել ճանապարհի երթևեկելի գոտուց և կողաշրջվել։
Վարորդ Սարգիս Ս.-ն մարմնական վնասվածքներով տեղափոխվել է Թալինի բժշկական կենտրոն։
Կայքի տեղեկություններով՝ Սարգիս Ս.-ն աշխատում է որպես ուղեկցող վարորդ և նշված ավտոմեքենայով Երևանից մի քանի գյուղեր էր տեղափոխում գյուղացիների թոշակները, և ոստիկանությունը ճշտում է՝ ավտոմեքենայում այդ պահին գումար եղել է, թե ոչ։