ԵՐԵՎԱՆ, 30 մարտի — Sputnik. ՀՀ արդարադատության նախարարության Անձնական տվյալների պաշտպանության գործակալությունը պահանջել է կասեցնել ռուս-թուրքական «ՎիզաՄետրիկ» ընկերության կողմից ՀՀ քաղքացիների անձնական տվյալների մշակումը: Այդպիսով ընկերությունը դեռևս հնարավորություն չի ունենա հավաքելու, ամրագրելու Հայաստանի քաղաքացիների անձնական տվյալները, համակարգելու դրանք, փոխանցելու որևէ մեկին կամ որևէ ձևով օգտագործելու դրանք։
Այդ մասին տեղեկացնում է ՀՀ արդարադատության նախարարության մամուլի ծառայությունը` նշելով, որ սահմանափակումը կգործի մինչև Անձնական տվյալների պաշտպանության գործակալության ստուգման գործողությունների ավարտը:
Ավելի վաղ նախարարությունը տեղեկացրել էր, որ սկսել է ստուգման գործընթաց, պարզելու, թե որքանով է «ՎիզաՄետրիկ» սահմանափակ պատասխանատվությամբ ընկերության կողմից անձնական տվյալների մշակումը համապատասխանում ՀՀ օրենսդրությանը:
2018 թվականի մարտի 30-ին «ՎիզաՄետրիկ» ընկերությունը Գործակալությանը ներկայացրել է հատուկ կատեգորիայի կամ կենսաչափական անձնական տվյալներ մշակելու վերաբերյալ ծանուցում, որի ուսումնասիրության արդյունքում Գործակալությունը գրությամբ դիմել է «ՎիզաՄետրիկ» ընկերությանը:
Գրությամբ Գործակալությունը «Անձնական տվյալների պաշտպանության մասին» ՀՀ օրենքի 20-րդ հոդվածով սահմանված իր լիազորության շրջանակում պահանջել է ծանուցման ուսումնասիրության արդյունքում անձնական տվյալների մշակման ստուգման համար անհրաժեշտ տեղեկություններ:
Հիշեցնենք, որ ապրիլի 3-ից Գերմանիա, Բելգիա, Նիդեռլանդներ, Լյուքսեմբուրգ, Ավստրիա և Շվեդիա մեկնելու համար շենգենյան վիզայի ստանալու դիմումները ՀՀ քաղաքացիները ստիպված են լինելու փաստաթղթերը ներկայացնել ոչ թե Գերմանիայի դեսպանություն, ինչպես ներկայում, այլ առանձին սպասարկող ընկերություն՝ «ՎիզաՄետրիկ» ՍՊԸ։
Այս մասին մարտի 28-ին հայտարարել է ՀՀ-ում Գերմանիայի արտակարգ և լիազոր դեսպան Մաթիաս Քիսլերը։
Ու թեև դեսպանը հայտարարել էր, որ հայաստանյան գրասենյակը ղեկավարելու է հայ ներկայացուցիչը և աշխատակազմում բացառապես ՀՀ քաղաքացիներ են լինելու, բայց միաժամանակ նաև շեշտել էր` «Վիզամետրիկը» ռուս-թուրքական կոնսորցիում է, որի հոլդինգ կազմակերպությունը գտնվում է Թուրքիայում։
Դեսպանի այս հայտարարությունը, բնականաբար, Հայաստանում աննկատ չի մնացել։ Մտավախություն է առաջացել, որ ՀՀ քաղաքացիների անձնական տվյալները կարող են հայտնվել թուքական ծառայությունների ձեռքում։