ԵՐԵՎԱՆ, 29 մարտի — Sputnik. Հանրահայտ ռուս պրոդյուսեր և կոմպոզիտոր Մաքս Ֆադեևը Կեմերովոյի «Զիմնյայա վիշնյա» առևտրի կենտրոնում բռնկած հրդեհի հետևանքով մահացած երեխաների հիշատակին երգ է գրել։
Երգից մի հատված նա հրապարակել է Instagram-ի իր էջում։
Ավելի վաղ արտիստը տեսանյութ էր հրապարակել, որտեղ ներկայացնում է երգի ստեղծման սրտահույզ պատմությունը։
«Մի ընկեր ունեմ՝ Անդրեյ անունով, որը Կրասնոդարից է։ Մի օր նա կորցրեց իր որդուն։ Կարծում եմ, որ երեխաներին հողին հանձնելը բնականոն չէ, սակայն կյանքում երբեմն նաև այդպես է լինում։ Ես ևս կորցրել եմ առաջին երեխայիս։ Տեսել եմ, թե ինչ անհույս վիճակում էր նա գտնվում, իր տեղը չէր գտնում։ Եվ ընդհանրապես այն ամենն, ինչ տեսել եմ, սարսափելի էր», — բաժանորդների հետ իր վշտով կիսվել է կոմպոզիտորը։
Ինչպես պատմել է Ֆադեևը, «Դու, միևնույնն է, ողջ ես» երգը գրել է ընկերոջ համար։ Եվ այն անձնական վշտի մասին է նաև դարձել։
«Շատ տարիներ են անցել այդ ժամանակից։ Երբ երեխաների հետ այդ ողբերգությունը տեղի ունեցավ («Զիմնյայա վիշնյա» առևտրի կենտրոնի հրդեհը), նա զանգահարեց ինձ և ասաց՝ «Այդ երգն օգնեց ինձ ողջ մնալ։ Ես ուզում եմ, որ դու այն բոլորի համար երգես», — տեսաուղերձում ասում է արտիստը։
Երաժշտի խոսքով` նա ձևափոխել է տեքստը և այսօր երգը կատարել է բոլոր մահացած երեխաների համար։ Նա շատ է ցանկանում, որպեսզի իր երգը գոնե մի քիչ թեթևացնի հարազատներին կորցրածների վիշտը։
«Եթե այն որևէ մեկին օգնի, ես անչափ երջանիկ կլինեմ։ Նրանք, միևնույնն է, ողջ են», — ավելացնում է Ֆադեևը։
Մաքս Ֆադեևի և նրա կնոջ` Նատալյայի առաջնեկը` դուստրը, մահացել էր ծնվելուց անմիջապես հետո՝ բժիշկների անփութության պատճառով։ Ավելի ուշ զույգը որդի էր լույս աշխարհ բերել` Սավվային։ Նա այժմ 20 տարեկան է։