ԵՐԵՎԱՆ, 29 մարտի — Sputnik. Հայաստանում արտադրված նոր սարքը թույլ է տալիս հայտնաբերել հակառակորդին նրա իսկ օպտիկական սարքավորումների շնորհիվ։ Այս մասին Sputnik Արմենիային ասաց հայ-հունական LT-Pyrkal ընկերության ներկայացուցիչ Պետրոս Գասպարյանը։ Նրա ընկերությունը ներկայացված է Երևանում անցկացվող ArmHiTec 2018 պաշտպանական տեխնոլոգիաների ցուցահանդեսին։
Այն գտնում է հակառակորդի օպտիկական սարքերը, այդ թվում՝ դիպուկահարների նշանառու սարքերը` նրանց անդրադարձրած (թեկուզ և փոքր) փայլով։
«Սարքը բավականին արդյունավետ է ու ազդեցության բավարար շառավիղ ունի։ Այն արդեն փորձարկվել է դաշտային պայմաններում», — հավելեց Գասպարյանը։
Ընկերության ևս մեկ մշակում է սաղավարտի վրա հագցվող համակարգիչը։ Համակարգչի հաղորդող սարքերը տեղանքի մասին տվյալներ են փոխանցում միկրոէկրանի վրա։ Իսկ էկրանին կարելի է նայել օկուլյարի միջոցով։ Այսինքն՝ սաղավարտը հագնելիս՝ մեկ աչքով կարելի է հետևել մոնիտորին։
Այդ համակարգչի տրամադրած տվյալներով շատ ավելի հեշտ է գործել ու որոշումներ կայացնել, պարզաբանեց Գասպարյանը։