Կոտայքի մարզում հաշվում են քամու վնասները

ԵՐԵՎԱՆ, 26 մարտի — Sputnik. Մարտի 25–ին տեղեկություն է ստացվել, որ նախորդ օրը գրանցված ուժեղ քամուց բազմաթիվ վնասներ են գրանցվել Կոտայքի մարզում։

Այս մասին տեղեկացնում է ՀՀ ԱԻՆ մամուլի ծառայությունը։

Մարտի 25-ին, ժամը 09:40-ին տեղեկություն է ստացվել, որ ուժեղ քամուց վնասվել են Կոտայքի մարզի Հրազդան քաղաքի միջնակարգ դպրոցի տանիքը և մոտ 10-15 տների տանիքներ:

Դեպքի վայր է մեկնել հրշեջ-փրկարարական ջոկատի օպերատիվ խումբը:

Պարզվել է, որ ուժեղ քամուց վնասվել են միջնակարգ դպրոցի տանիքը և պոկվել շքամուտքի կախովի առաստաղը, 2-րդ թաղամասում՝ թիվ 60 տան շքամուտքի պատին առաջացրել ճեղք (մոտ 5 սմ) և պոկվել է անասնագոմի տանիքը։ Պոկվել է նաև թիվ 70 տան բակում գտնվող ավտոտնակի, անասնագոմի և թիվ 53 տան տանիքը, 3-րդ թաղամասի թիվ 34 տան տանիքը, 3-րդ փողոցի 3-րդ նրբանցքի թիվ 7 տան անասնագոմի և մառանի տանիքը, 2-րդ փողոցի թիվ 6 տան և 8-րդ թաղամասի թիվ 20 տան անասնագոմի տանիքը։

Դեպքի վայր է մեկնել հրշեջ-փրկարարական ջոկատի օպերատիվ խումբը:

Ուժեղ քամին վնասել է նաև Կոտայքի մարզի Գետամեջ գյուղի «Գետամեջ» թռչնաբուծական ֆաբրիկայի տանիքը, Կոտայքի մարզի Հրազդան քաղաքի Միկրոշրջան թաղամասի թիվ 264 շենքի մոտակայքում գտնվող ավտոտնակի տանիքը, Կոտայքի մարզի Հրազդան քաղաքի Մաքրավան թաղամասի Շնորհալի փողոցում գտնվող տներից մեկի տանիքը` այն գցելով թիվ 12 տան պարսպի վրա, ինչի հետևանքով վերջինը փլուզվել է։ Քամին վնասել է նաև Կոտայքի մարզի Հրազդան քաղաքի Վանատուր թաղամասի թիվ 503 տան տանիքը և պատշգամբը, Կոտայքի մարզի Հրազդան քաղաքի Շահումյան փողոցի թիվ 7 հասցեում գտնվող արտադրամասի տանիքը: Կոտայքի մարզի Գառնի գյուղի Այգեստան փողոցի 3-րդ փակուղու թիվ 6 տան տանիքը: Վնասվել է նաև Կոտայքի մարզի Պռոշյան գյուղի Գ. Չաուշի փողոցի 4-րդ նրբանցքի տան տանիքը:

Ստացված տեղեկությունները փոխանցվել են համապատասխան մարմիններին։