ԵՐԵՎԱՆ, 21 մարտի — Sputnik. «Աիիսա» վրացական ընկերության պահպանակները լուրջ աղմուկ են բարձրացրել հասարակության շրջանում, արտադրանքի տարածման «կրեատիվ մոտեցումը» դուր չի եկել քաղաքական գործիչներին և պատրիարքարանին։
«Սաքարթվելո» կուսակցությունը և պատրիարքարանն արդեն քննադատել են արտադրողներին, որոնք պահպանակների փաթեթների վրա պատկերել են քաղաքական գործիչների, այդ թվում` վրացական եկեղեցու կողմից սրբադասված անձանց պատկերները։
Վրացական «Աիիսա» ընկերությունը, որի հիմնադիրն Անանիա Գաչեչիլաձեն է, պահպանակներ է արտադրում 2017թ-ից։ Թամար թագուհու, Մայր Վրաստանի, քաղաքական գործիչների պատկերներով և եկեղեցական տոներին նվիրված արտահայտություններով փաթեթներն իսկական սկանդալ են բարձրացրել Վրաստանում։ Լուսանկարները կարելի է տեսնել ընկերության ֆեյսբուքյան էջում։
Օգտատերերը հատկապես կոշտ քննադատության են ենթարկել Թամար թագուհու և Մայր Վրաստանի պատկերներով պահպանակների լուսանկարները։
«Նույնիսկ ինձ պես աթեիստը գիտի, որ սրբերի հարցում չափն արդեն անցել են», — գրել է օգտատեր George Popkhadze-ն։
Օգտատերերը ընկերությանը հորդորել են չափավորել երևակայությունը։ Նրանց կարծիքով` ոչինչ, որ որոշ փաթեթների վրա պատկերված է Ստալինը, բայց վրացական սրբերի և մասունքների պատկերները բոլորովին անտեղի են։
Վրաստանի պատրիարքարանի ներկայացուցիչներին ապշեցրել է պահպանակ արտադրողների քայլը։ Նրանք արդեն հանդես են եկել «կրեատիվ» ընկերության հասցեին կոշտ հայտարարությամբ` պահանջելով, որ Վրաստանի իշխանություններն անհապաղ արձագանքեն։
«Պահանջում ենք իշխանությունների կոշտ արձագանքը, որպեսզի հավատացյալները (քրիստոնյաները, հրեաները, մահմեդականները) ազատվեն անարդարության և անպաշտպանության զգացմունքից», — նշված է պատրիարքարանի հայտարարությունում։
Համապատասխան պահանջով հանդես է եկել նաև «Սաքարթվելո» կուսակցությունը և ընդգծել, որ պահպանակների փաթեթների պատկերները վիրավորում են մարդկանց ազգային և կրոնական զգացմունքները։
Կուսակցությունը պահանջել է վաճառքից հանել արտադրանքը։
«Աիիսա» ընկերությունն էլ հանդես է եկել պատասխան հայտարարությամբ։
«Շնորհակալություն Վրաստանի պատրիարքարանին դրսևորած հետաքրքրության և պահպանակների շուկայում վրացական ապրանքանիշ ընտրելու համար։ Մեզ համար ցանկացած նման հայտարարություն ոգեշնչման աղբյուր է։ Բնակչության մնացած մասին կոչ ենք անում մեծ հանդուրժողականություն դրսևորել և մասնակցել հանգիստ մթնոլորտի ձևավորմանը, կարծիք հայտնել առանց բռնության ու սպառնալիքների», — նշված է ընկերության հաղորդագրությունում, որը հրապարակվել է Facebook-ի պաշտոնական էջում։
Ապրանքանիշի ստեղծողները հուսով են, որ պատրիարքարանը մոտ ապագայում կհամագործակցի նրանց հետ այնպիսի կարևոր սոցիալական խնդիրների լուծման հարցում, ինչպիսիք են սեռական կրթությունը, բռնությունը և վեներական հիվանդությունների կանխումը։
Առայժմ պարզ չէ, թե ինչով կավարտվի վրացական պահպանակների հետ կապված սկանդալը։