ԵՐԵՎԱՆ, 21 մարտի, Sputnik. Ճանապարհային ոստիկանությունում տեղի ունեցած աշխատանքային խորհրդակցության ժամանակ քննարկվել են ճանապարհային երթևեկության անվտանգության կանոնների վերաբերյալ գիտելիքները հարստացնելու ծրագրի ներդրման հետ կապված խնդիրներ. նախատեսվում է 1-4-րդ դասարաններում ավելացնել համապատասխան դասընթացները։ Այս մասին տեղեկացնում է ՀՀ ոստիկանության մամուլի ծառայությունը։
1-ից 4-րդ դասարանի աշակերտներիհամար մշակվել էր հանրկրթական հաստատություններում երթևեկության կանոններն ուսուցանելու նախագիծ, որը այս տարվա փետրվարի 8-ին կրթության և գիտության նախարարի հրամանով հաստատվեց։ Հիմա պետք է նախագիծը կյանքի կոչվի:
Խորհրդակցության ընթացքում ճանապարհային ոստիկանության պետը ներկայացրեց 2016 և 17 թվականների վիճակագրական տվյալները, ըստ որոնց՝ 2016-ին անչափահասների մասնակցությամբ տեղի է ունեցել 158 վրաերթ, 6 երեխա զոհվել է, 156-ը ստացել տարբեր աստիճանի մարմնական վնասվածքներ, 2017-ին արձանագրվել է անչափահասների մասնակցությամբ 177 վրաերթ, 2 երեխա է զոհվել, 150-ից ավելի էլ՝ ստացել տարբեր աստիճանի մարմնական վնասվածքներ։ Վերլուծությունը փաստել է, որ վրաերթերի 70 տոկոսը տեղի է ունեցել հետիոտնի մեղավորությամբ՝ անչափահասները հիմնականում ճանապարհն անցել են չթույլատրվող հատվածով։
Ժանապարհային ոստիկանության ղեկավար Եգոր Կարապետյանը ներկայացրեց նաև անչափահասների մասնակցությամբ պատահարները նվազագույնի հասցնելու ուղղությամբ ճանապարհային ոստիկանության նախաձեռնած մի շարք միջոցառումներ, որոնք դրական արդյունք են տվել։ Ճանապարհային ոստիկանության պետի համոզմամբ՝ նոր նախաձեռնությունը ևս արդյունավետ է լինելու։
Նախատեսվում է սկսել մայրաքաղաքի դպրոցներից։ Քննարկվեց դասավանդման ձևաչափը․ նախապես ճանապարհային ոստիկանության ծառայողները դասընթացներ կանցկացնեն ուսուցիչների հետ, որոնք ստացած գիտելիքները կփոխանցեն աշակերտներին։ Հարկ եղած դեպքում ուսուցիչները պրակտիկ գիտելիքներ կստանան նաև ճանապարհային ոստիկանության հաշվառման-քննական բաժինների ավտոդրոմներում։ ճանապարհային ոստիկանները հենց խաչմերուկներում աշակերտներին կսովորեցնեն՝ ինչպես անվտանգ անցնել փողոցը, որ իրավիճակում ինչ անել, նաև կանցկացնեն գործնական պարապմունքներ։ Կողմերը հույս հայտնեցին, որ նախապատրաստական աշխատանքներն ու առկա խնդիրները մինչև նոր ուսումնական տարվա սկիզը կհաղթահարվեն և արդեն սեպտեմբերի 1-ից ծրագիրը կմեկնարկի։