ԵՐԵՎԱՆ, 13 մարտի — Sputnik. Մարտի 11-ին ՀՀ 20 համայնքներում անցկացված ՏԻՄ ընտրություններն այդ համայնքների բնակիչների կյանքում շատ բան չի փոխվի։
Համայնքներից միայն երկուսում` Լոռու մարզի Դեբետ և Արարատի մարզի Նորամարգ գյուղերում են նոր գյուղապետներ ընտրվել։
Դեբետն այսուհետ կղեկավարի անկուսակցական, 30–ամյա Աշոտ Ղազարյանը, ով մինչ այդ նույն գյուղի ավագանու անդամն էր։ Նորամարգում գյուղապետ է ընտրվել ՀՀԿ-ական Արման Թադևոսյանը:
Մնացած 18 համայնքապետերում վերընտրվել են գործող գյուղապետները, որոնք արդեն մի քանի տարի ղեկավարում են իրենց համայնքները։
Լոռու մարզի Լեռնավան գյուղում համայնքի ղեկավար է ընտրվել 2010թ–ից անփոփոխ գործող ՀՀԿ–ական Վաչագան Վարդանյանը, Արմավիրի մարզի Մեծամոր գյուղում վերընտրվել է ՀՀԿ–ական Էդվարդ Միրզոյանը, ով 1999 — 2010թթ. աշխատել է Մեծամորի գյուղապետարանում` որպես գյուղապետի տեղակալ, իսկ 2010թ.–ից` գյուղապետ։ Արագածոտնի մարզի Դդմասարգյուղում վերընտրվել է 2004–ից գործող գյուղապետ ՀՀԿ–ական Ռաշիդ Օսեյանը, Կոտայքի մարզի Հացավան գյուղում էլ կշարունակի մնալ 2003թ.–ից պաշտոնավարող ԲՀԿ–ական Շավարշ Սարգսյանը։
Արարատի մարզում ևս պատկերը նույնն է. Սիս համայնքում վերընտրվել է ՀՀԿ–ական Արմեն Եղյանը, Սայաթ-Նովայում` ԲՀԿ–ական Ռազմիկ Ալավերդյանը, Հայանիստում` ՀՀԿ–ական Բալաբեկ Մարկիսյանը, ովքեր այդ պաշտոնում են 2010թ.–ից։
Նույն մարզի Նորամարգ գյուղում վերընտրվել է ՀՀԿ–ական Արման Թադևոսյանը, ով 1991-1996թթ. եղել է Մասիսի շրջանի Կալինին ավանի գյուղական խորհրդի գործկոմի նախագահը, իսկ 1996թ.-ից` Նորամարգի գյուղապետը, Խաչփարում ու Եղեգնավանում ևս վերընտրել են 1996թ–ից անփոփոխ պաշտոնավարող գյուղապետերին` ՀՀԿ–ական Ղազար Մարտիրոսյանին ու անկուսակցական Հովսեփ Ղազարյանին, իսկ Զորակում 1997թ–ից գյուղապետ աշխատող Մանուկ Մալոյանին։
Նիզամի և Դարբնիկ համայնքներում վերընտրվել են 2014-ին գյուղապետի պաշտոնը ստանձնած ՀՀԿ–ական Հարութին Կարապետյանն ու Դավիթ Գզիրյանը։
Նշված համայնքներից շատերում զուգահեռ տեղի են ունեցել նաև ավագանու անդամների ընտրություններ: Դրանց արդյունքում ևս փոփոխությունները չնչին են։
ՀՀ ԿԸՀ–ից Sputnik Արմենիային հայտնեցին, որ տեղական ինքնակառավարման մարմինների ընտրությունների քվեարկության արդյունքների վերահաշվարկի դիմում ներկայացրել է միայն Արարատի մարզի Նորամարգ համայնքի ղեկավարի թեկնածուներից մեկը, ով պահանջել է վերահաշվարկել գյուղի մի ընտրատեղամասի քվեարկության արդյունքները:
Մյուս համայնքներում տեղի ունեցած ընտրությունների վերաբերյալ սահմանված ժամկետում որևէ դիմում, բողոք չի ներկայացվել: