ԵՐԵՎԱՆ, 10 մարտի —Sputnik. Անկարան պատրաստ է պատասխանել ԱՄՆ-ի հավանական պատժամիջոցներին, ասել է Թուրքիայի արտգործնախարար Մևլութ Չավուշօղլուն գերմանական Zeit թերթին տված հարցազրույցում։
«Եթե նրանք ցանկանում են Թուրքիայի նկատմամբ պատժամիջոցներ կիրառել, Թուրքիան այլ կերպ կարձագանքի, քան Ռուսաստանն ու մյուս երկրները», — նշել է Չավուշօղլուն` մեկնաբանելով լրագրողի հարցն այն մասին, թե ինչպես են Թուրքիայի իշխանությունները մտադիր արձագանքել հավանական պատժամիջոցներին, որոնք արդեն մի քանի ամիս քննարկում են ամերիկյան կոնգրեսի ներկայացուցիչները։
Նախարարն ավելացրել է, որ Թուրքիան անպայման պատասխան կտա և չի հանդուրժի ԱՄՆ-ի սպառնալիքները։
Չավուշօղլուն ընդգծել է, որ ամերիկյան կառավարությունը մշտապես ուղղություն է տալիս այլ երկրներին և հաճախ սպառնալիքներ է հնչեցնում։
Փետրվարի 16-ին Չավուշօղլուն ԱՄՆ պետքարտուղար Ռեքս Թիլերսոնի հետ բանակցություններից հետո հայտնել էր, որ թուրքական և ամերիկյան կողմերը պայմանավորվել են բարելավել հարաբերությունները։
Ավելի վաղ Եվրոպայում ՆԱՏՕ-ի ուժերի գլխավոր հրամանատար, ամերիկացի գեներալ Կյորտիս Սկապարոտին հայտարարել էր, թե ԱՄՆ-ն հույս ունի, որ Անկարան կհրաժարվի ռուսական С-400 ԶՀՀ գնելուց` նախազգուշացնելով նման քայլի «հետևանքների» մասին։