ԵՐԵՎԱՆ, 8 մարտի — Sputnik. «Ձայնը» շոուի հայ մասնակից, 14-ամյա Կարեն Հայրապետովը զարմացրել է ժյուրիի անդամներին հաճելի ձայնով և կատարմամբ, բայց կույր լսումների փուլը չի հաղթահարել. ժյուրիի անդամներից ոչ մեկը չի շրջվել։
Պատանին երգել է Վալերի Մելաձեի «Ինչքան գեղեցիկ ես դու» երգը, մեծ դիապազոնը թույլ է տվել կատարել բարդ ելևէջները, իսկ դահլիճում ժյուրիի անդամի բազկաթոռին նստած երգիչը չի կարողացել թաքցնել հիացմունքը։
«Երևի համեստություն չի լինի ինչ-որ բան ասելը։ Սա իմ ամենասիրելի երգերից է։ Շնորհակալություն, Կարեն, որ ընտրել ես այն։ Ես երգում էի այս երգը` քեզ մեջքով նստած», — խոստովանել է Մելաձեն։
«Ես էլ, ես էլ», — բացականչել են ժյուրիի մյուս անդամները։
Մելաձեն ասել է, որ իր համար շատ հաճելի է եղել, բայց մեկնաբանություններից զերծ է մնացել։
«Լավ կոմպոզիտոր գտիր, որն ամեն անգամ, երբ ձայնդ կփոխվի, քեզ համար նոր երգ կգրի», — տղային խորհուրդ է տվել Մելաձեն։ Երգչի խոսքով` իր համար նման կոմպոզիտոր կլինի եղբայրը` Կոնստանտին Մելաձեն։
Կարենը պատմել է, որ ապրում է Մոսկվայում, բայց ծնվել է Երևանում։ Դրան ի պատասխան Բաստան ասել է «բարև»։
Հայրապետովը խնդրել է Մելաձեին իր հետ երգել այդ երգը, արտիստը սիրով համաձայնել է։