ԵՐԵՎԱՆ, 7 մարտի — Sputnik. Սիրիայի Հմեյմիմ օդանավակայանում եղանակային պայմանները, այդ թվում քամու տեղաշարժը, կարող էին ազդել Ան-26-ի վթարման վրա։ Այս մասին ՌԻԱ Նովոստիին տված հարցազրույցում ասել է Ան-26-ի նախկին օդաչու և միջգերատեսչական ավիացիոն փորձագիտական խորհրդի փորձագետ Վիկտոր Գալենկոն։
Ռուսական ռազմատրանսպորտային Ան-26 օդանավը մարտի 6-ին կործանվել էր Հմեյմիմ օդանավակայանում վայրէջք կատարելիս։ Ինքնաթիռում, ՌԴ ՊՆ–ի վերջին տվյալներով, 33 ուղևոր և անձնակազմի 6 անդամ էր եղել։ Բոլորը ՌԴ ԶՈՒ զինծառայողներ են։
«Ցածր բարձրությունների վրա թռչող օդանավերի համար լուրջ վտանգ է ներկայացնում քամու տեղաշարժը. արագության և/կամ քամու ուղղության կտրուկ և զգալի փոփոխությունը փոքր տարածության վրա։ Հաճախ քամու տեղաշարժ է առաջանում ցածր բարձրության վրա` ջերմաստիճանային շրջման հետևանքով, երբ սառը օդը երկար մնում է գետամերձ շերտում, օրինակ, նախալեռնային հովիտներում, իսկ տաք հոսանքները տեղաշարժվում են սառը օդային զանգվածի վրա», – ասաց Գալենկոն։
Նրա խոսքով` այս օրերին Լաթաքիայում ջերմաստիճանը կտրուկ նվազել է 23-ից 17 աստիճան, բացի այդ քամու կտրուկ ուժգնացում է տեղի ունեցել։
«Երբ սառը օդը գալիս է տաքացած մակերևույթի վրա, անկայուն օդային զանգված է առաջանում, ինչը հանգեցնում է քամու ուղղության անկանխատեսելի փոփոխության։ Սրանք կատարյալ պայմաններ են գետամերձ շերտում քամու տեղաշարժի համար», – պարզաբանեց նա։
Ան-26-ի նման ինքնաթիռները, նշել է փորձագետը, քամու տեղաշարժի հայտնաբերման ժամանակակից համակարգ չունեն։ Միևնույն ժամանակ ջերմաստիճանի նման կտրուկ փոփոխության պայմաններում քամու ուժգնացումը սկզբում տեղի է ունենում բարձրության վրա և միայն հետո հասնում ցամաք, նշել է նա։
«Այս մետեոերևույթը գրեթե չի հաշվարկվում երկրի մակերևույթից և չի նշվում կանխատեսումներում», – կարծում է փորձագետը։
«Օդանավը կարող էր ընկնել ինչպես վայրընթաց, այնպես էլ վերընթաց օդային հոսանքի մեջ։ Ինքնաթիռն անկառավարելի է դառնում, հանկարծակի աճում է ուղղահայաց արագությունը», – ասաց Գալենկոն։
Վայրէջք կատարելու ժամանակ օդի արագության և ինքնաթիռի հարաբերական բարձրության նշանակությունը կրիտիկականի է հասնում, այդ պատճառով ինքնաթիռն առավել դյուրընկալ է դառնում օդի տեղաշարժի անբարենպաստ ազդեցությանը, եզրահանգել է նա։