ԵՐԵՎԱՆ, 6 մարտի — Sputnik. Սինգապուրի, Հարավային Կորեայի, Ավստրալիայի ու Նոր Զելանդիայի քաղաքացիները կկարողանան առանց վիզայի Հայաստան այցելել։ Այս մասին որոշումն ընդունվեց այսօր կառավարության նիստում։
Առանց վիզայի ռեժիմը սովորական ժամկետով է գործելու` այդ երկրների քաղաքացիները կարող են տարեկան 180 օր Հայաստանում գտնվել։ Առանց վիզայի ռեժիմը միակողմանի է լինելու, այսինքն հայաստանցիներն առանց վիզայի այդ երկրներ այցելելու հնարավորություն չեն ստանա։
Արտաքին գործերի փոխնախարար Շավարշ Քոչարյանը հայտնեց, որ այդ երկրները զբոսաշրջության ու բիզնեսի տեսանկյունից շատ հեռանկարային են։ Այդ երկրներից յուրաքանչյուրում ավելի քան 170 երկրի հետ առանց վիզայի ռեժիմ է գործում։ Նաև այնտեղ շատ բարձր են ՀՆԱ ցուցանիշները մեկ մարդու համար (Ավստրալիայում`49,9 հազար դոլար, Նոր Զելանդիայում` 38,5 հազար, Կորեայում` 38 հազար, Սինգապուրում` 52 հազար)։
Ընդ որում`Ավստրալիայում հայկական խոշոր համայնք կա. ՀՀ սփյուռքի նախարարության տվյալների համաձայն`այնտեղ մոտ 80 հազար հայ է ապրում։
ՀՀ վարչապետ Կարեն Կարապետյանը հավանեց այս գաղափարը. «Հենց այդպիսի երկրների հետ աշխատեք, որոնք ունեն բարձր ՀՆԱ։ Օգուտն ակնհայտ կլինի», — ժպիտով ասաց վարչապետը։