ԵՐԵՎԱՆ, 2 մարտի — Sputnik. Սերժ Սարգսյանն այսօր նախագահական նստավայրում ընդունել է խորհրդարանի կողմից նախագահ ընտրված Արմեն Սարգսյանին և շնորհավորել է Արմեն ՀՀ նախագահի պաշտոնում ընտրվելու կապակցությամբ։ Այս մասին հայտնում է ՀՀ նախագահի մամուլի ծառայությունը։
Սերժ Սարգսյանը վստահություն է հայտնել, որ Արմեն Սարգսյանը լավագույնն է կատարելու հանրապետության նախագահի պարտականությունները:
«Այս ընթացքում ուշադրությամբ հետևելով Ձեր հանդիպումներին՝ ես ուղղակի համոզված եմ, որ ամեն ինչ լավ է լինելու: Մինչև Ձեր պարտականությունների ստանձնումը մնացել է քառասուն օր: Այս քառասուն օրերի ընթացքում Դուք ամբողջովին կարող եք ապավինել իմ աշխատակազմի, մեր պետական կառույցների բոլոր պաշտոնյաների աջակցությանը և տնօրինեք այդ ժամանակը ինչպես կցանկանաք, որովհետև այդ դժվար և պատվաբեր պարտականությունները կատարվում են ի շահ մեր ժողովրդի»,-ասել է Սերժ Սարգսյանը:
Նորընտիր նախագահը շնորհակալություն է հայտնել Սերժ Սարգսյանին շնորհավորանքի և բարեմաղթանքների համար:
«Շատ գնահատելի է վերջին տարիների ընթացքում Ձեր տեսլականը և փոփոխությունները, որոնք կատարվում են մեր հայրենիքում՝ անցումը դեպի նոր՝ խորհրդարանական կառավարման հանրապետության, որը նոր դռներ է բացում ժողովրդավարության ամրապնդման համար,- ասել է նա,- անշուշտ, Հայաստանի անդամակցությունը Եվրասիական տնտեսական միությանը, Հայաստանի շատ ավելի խորը հարաբերությունները և պայմանավորվածությունները Եվրամիության հետ, մասնակցությունը նոր բազմաթիվ միջազգային կառույցներում և ընդհանրապես տնտեսության մեջ տեղի ունեցող նոր դրական փոփոխությունները հիմք են տալիս վստահությամբ նայելու ապագային»։
Նշենք, որ ՀՀ նոր Սահմանադրության համաձայն` նորընտիր նախագահն իր պաշտոնը կստանձնի Հանրապետության նախորդ նախագահի լիազորությունների ավարտման օրը` ապրիլի 9-ին: