ԵՐԵՎԱՆ, 1 մարտի — Sputnik. Հայաստանն անկախության առաջին տարիներին տնտեսապես ավելի թույլ էր, սակայն, միգուցե, ավելի արդար, և հասարակությունն այդքան բևեռացված չէր հարուստի և աղքատի: ՀՀ 4-րդ նախագահի ընտրության հարցի քննարկման ժամանակ ասաց Արմեն Սարգսյանը։
«Այսօր մեր պետությունն ավելի հզոր է, հարուստ, սակայն հասարակությունը բևեռացված է, ունենք աղքատություն, սոցիալական անհավասարություն, որը մեր բոլորի խնդիրն է»,- ասաց ՀՀ նախագահի թեկնածուն:
Սարգսյանը շեշտեց, որ հաջորդ 26 տարիները հայ ժողովուրդը պետք է շարունակի կառուցել՝ հիշելով և չմոռանալով այն հաջողությունների բանալին, որ ինքն է բացահայտել և չմոռանալով դասեր քաղել թույլ տված սխալներից, որպեսզի դրանք չկրկնվեն:
Սարգսյանը կարևորեց քաղաքացիական հասարակության դերը ՀՀ ժողովրդավարության գործում։
«Քաղաքացին ոչ միայն ընտրությունների կամ սոցիալական սուր հարցեր բարձրացնելիս պիտի արթնանա, այլ քաղաքացիական ակտիվ դիրքորոշումը պետք է դրսևորի ամենօրյա կյանքում՝անարդարության դեմ անհանդուրժողականությամբ», — նշեց նա։
Նա ընդգծեց նաև, որ սոցիալական արդարության պահանջը հասարակության զգայուն մասերից մեկն է։
«Մարդ չի կարող իրեն երջանիկ զգալ աղքատության պայմաններում։ Ստեղծված իրավիճակի արմատական փոփոխությունը բոլորիս պարտքն է», — ասաց նա
Սարգսյանը երազում է, որ ՀՀ-ն դինամիկ զարգացող ինտելեկտուալ երկիր դառնա։