ԵՐԵՎԱՆ, 1 մարտի — Sputnik. Լոս Անջելեսի Պանորամա Սիթի շրջանի փողոցներից մեկում սպանվել է 22 տարեկան Օրբել Նազարյանը, հայտնում է Los Angeles Daily News առցանց պարբերականը` հղում անելով Լոս Անջելեսի ոստիկանության պետ Չարլի Բեքին։
Բեքի խոսքով` Նազարյանը, որին սպանել են երկուշաբթի, ինքնասպանության հակվածություն ուներ ։
«Երիտասարդը երկուշաբթի առավոտյան զանգահարել էր «911» ծառայություն և հայտնել, որ զինված է ատրճանակով և դանակով։ Քաղաքացին սպառնում էր ինքնասպան լինել», — գրված է հաղորդագրության մեջ։
Միջադեպը տեղի է ունեցել տեղի ժամանակով ժամը 8:45-ին, իրավապահներն ահազանգ են ստացել և մեկնել դեպքի վայր։ Պարզել են, որ զանգահարողը նախկինում բազմաթիվ անգամ հայտնվել է հոգեբուժարանում։
«Դեպքի վայր ժամանած իրավապահները տեսան, որ երիտասարդի մոտ կեսմետրանոց սուր ձող կա։ Նա հրաժարվում էր ենթարկվել ոստիկաններին և նրանց կյանքի համար վտանգ էր ստեղծում», — նշել է Բեքը։
Նա ավելացրել է, որ իրավապահներն ամեն ինչ տեսանկարահանել են։ Նազարյանը հրաժարվել է զենքը վայր դնել, փոխհրաձգություն է սկսվել, որի հետևանքով երիտասարդը մահացել է։
Բեքը պարզաբանել է, որ ցավոք, սա ինքնասպանության հերթական դեպքն էր, երբ մարդիկ գերադասում են իրենց կյանքից զրկել Լոս Անջելեսի ոստիկանության դեպարտամենտի միջոցով։