ԵՐԵՎԱՆ, 28 փետրվարի — Sputnik. ՀՀ բարձրագույն դատական խորհրդի անդամներն ընտրված են: ՀՀԿ խմբակցության քարտուղար Գագիկ Մելիքյանը, ներկայացնելով այսօր առավոտից ընթացող փակ գաղտնի քվեարկության արդյունքները, նշեց, որ ընտրությանը մասնակցել է 105 պատգամավորներից 98-ը:
Խորհրդի անդամի առաջին պաշտոնի համար Գագիկ Հարությունյանին կողմ էր քվեարկել 96 պատգամավոր, դեմ՝ 2, երկրորդ պաշտոնի համար առաջադրված Գևորգ Դանիելյանին կողմ քվեարկեց 90, դեմ՝ 7 պատգամավոր, երրորդ պաշտոնի համար առաջադրված Լիպարիտ Մելիքջանյանին` կողմ 82, դեմ՝ 15, անվավեր՝ մեկ, չորրորդ պաշտոնի համար առաջադրված Հայկ Հովհաննիսյանին` կողմ 86, դեմ՝ 11, անվավեր՝ մեկ, 5-րդ պաշտոնի համար առաջադրված Սերգեյ Մեղրյանին կողմ էր քվեարկել` 87, դեմ՝ 10, անվավեր՝ մեկ պատգամավոր:
Այս պահին ԱԺ-ում տեղի է ունենում բարձրագույն դատական խորհրդի նորընտիր անդամների երդմնակալության արարողությունը: Բայց մինչ նրանք ստանձնում են իրենց նոր պաշտոնները, ԱԺ-ում այս հարցի շուրջ նոր սկանդալ է հասունանում:
«Ելք» խմբակցության ղեկավար Նիկոլ Փաշինյանը հայտարարեց, որ իրենց խմբակցության բոլոր 7 պատգամավորները Գագիկ Հարությունյանին և Գևորգ Դանիելյանին դեմ են քվեարկել, բայց «իշխանությունը ժուլիկություն է անում»` նրանց ձայները կողմ հաշվարկելով: Հաշվիչ հանձնաժողովի անդամ Լենա Նազարյանն էլ հակադարձեց, որ ինքը ներկա է եղել ձայների հաշվարկին, թեև միաժամանակ չբացառեց, որ հանձնաժողովականները փոխել են քվեաթերթիկները: