Ազգային ժողովն այսօր աշխատանքը սկսեց 1988-ին Ադրբեջանի կողմից սպանված Սումգայիթի հայ բնակչության հիշատակը մեկ րոպե լռությամբ հարգելով։
«Սումգայիթյան ջարդերը միջազգային հարթակներում չեն արժանացել համարժեք քաղաքական և իրավական գնահատականի»,- ասաց ԱԺ նախագահ Արա Բաբլոյանը։
«30 տարի առաջ այս օրերին Ադրբեջանի Սումգայիթ քաղաքում պետական մակարդակով կազմակերպված հանցագործության հետևանքով դաժանաբար սպանվեցին հայազգի հարյուրավոր բնակիչներ։ Ադրբեջանական իշխանությունների կողմից իրականացված ջարդերի նպատակն էր հայերին վախեցնել նոր ցեղասպանությամբ և ստիպել հրաժարվել ազգային-ազատագրական պայքարից»,- ասաց Արա Բաբլոյանը՝ շեշտելով, որ 30 տարի իրականացված հանցանքն առ այսօր չի արժանացել միջազգային իրավական ու քաղաքական գնահատականի։
Դա, ըստ Բաբլոյանի, էլ ավելի խրախուսեց Ադրբեջանին շարունակելու էթնիկ զտումները և ջարդերը նաև Կիրովաբադում, Բաքվում, Մարաղայում և այլ հայաբնակ վայրերում։