ԵՐԵՎԱՆ, 25 փետրվարի —Sputnik. Շանսոնների հայտնի կատարող Լյուբով Ուսպենսկայան օրերս սոցցանցերում ամենաքննարկվող արտիստն է դարձել։ Բայց առիթն ամենևին նրա տարեդարձը չէ։ Այս մասին հայտնում է 7дней.ru պարբերականը։
Քննադատների թիրախում է հայտնվել Instagram-ում շանսոնի թագուհու հրապարակած տեսագրությունը։
«Այսպես են զվարճանում հայերը, բեմը ողողում են 100-դոլարանոց թղթադրամներով, ավանդույթները չեն փոխվում», — տեսանյութի տակ մակագրել է Ուսպենսկայան։
Տեսագրությունն արվել է մասնավոր երեկույթներից մեկի ժամանակ «Շանսոնի թագուհու» ելույթի պահին։ Տեսանյութում Ուսպենսկայան պարում է հատակին թափված կանաչ թղթադրամների վրա։
Ուսպենսկայայի երկրպագուներին զայրացրել է նրա պահվածքը։ Շատերը կարծիք են հայտնել, որ չի կարելի այդպես ծաղրել մարդկանց, որոնք ապրուստի միջոց չունեն։
Ավելի ուշ աստղի հրապարակման տակ արված գրառումները հեռացվել էին, նա արգելափակել է նաև տեսանյութը մեկնաբանելու հնարավորությունը։
Երեք օրվա ընթացքում տեսանյութը դիտել են ավելի քան 121 հազար անգամ։ Ուսպենսկայան այդ օրը իր 64-ամյակն է տոնել` Սոչիի Ռոզա Խուտոր հանգստավայրում համերգ տալով։