ԵՐԵՎԱՆ, 25 փետրվարի —Sputnik. Լոնդոնի «Արսենալի» ավագը հայ կիսապաշտպան Հենրիխ Մխիթարյանին փայլուն խաղացող է համարում և նշում է, որ նրա շնորհիվ թիմն առաջ կգնա։ Այս մասին հայտնում է Evening Standard պարբերականը։
Մերտեզակերի խոսքով` թիմում Մխիթարյանի հայտնվելը լոնդոնցիների համար խթան դարձավ առաջխաղացման, հաջողություններ գրանցելու համար։ Նա նշել է, որ ի սկզբանե կիսապաշտպանի հետ կապված հույսերն ու սպասելիքներն արդարանում են։
«Ինձ ասել են, որ նա արդեն գոլային 5 փոխանցում է կատարել, և ես չեմ զարմանում, քանի որ նա դաշտը շատ լավ է պատկերացնում և բավական ստեղծարար է, արագ որոշումներ է կայացնում։ Նա ոչ միայն լավ խաղացող է, այլև հիանալի մարդ։ Հենրիխը շահագրգռված է թիմի առաջընթացի հարցում և սովորելու ձգտում ունի, թեև նա արդեն 29 տարեկան է։ Նրա հետ աշխատելը` հաճույք է։ Նա ուզում է «Արսենալի» ԴՆԹ-ն ձեռք բերել, որն այդքան համապատասխանում է նրան», — ասել է Մերտեզակերը։
Նրա խոսքով` մեծ հաճույք է նաև հետևելու Մխիթարյանի և Օզիլի համագործակցությանը։
Հիշեցնենք, որ Հենրիխ Մխիթարյանն «Արսենալ» էր տեղափոխվել հունվարի երրորդ տասնօրյակում, այդ օրվանից նա «զինագործների» կազմում երկու խաղի է մասնակցել։ Առաջին խաղում «Սուոնսիի» հետ կիսապաշտպանը փոխարինման դուրս եկավ երկրորդ խաղակեսում և գրեթե չկարողացավ օգնել թիմին, սակայն «Էվերթոնի» հետ երկրորդ խաղն իր հաղթանակն էր։ Մխիթարյանը խաղի ընթացքում երեք գոլային փոխանցում կատարեց և խաղաշրջանի ընթացքում փոխանցումների թվով հավասարվեց չիլիացի Ալեքսիս Սանչեսի հետ, որը «ՄՅու» էր տեղափոխվել։