ԵՐԵՎԱՆ, 24 փետրվարի — Sputnik. Ադրբեջանցի Օրդուհան Թեյմուրխանի` Արցախի հուշարձանների վերաբերյալ հայտարարությունը քննադատության ալիք է բարձրացրել։ Այս մասին հայտնում է haqqin.az պարբերականը։
«Հայերը Ղարաբաղում ադրբեջանական գերեզմաններն ու հուշարձանները չեն քանդել», — ասել է Թեյմուրխանը` ելույթ ունենալով Եվրոպայում կազմակերպված միջոցառումներից մեկի ժամանակ։
Նրա խոսքով` թեև ադրբեջանական գերեզմանների վրայով խոզեր ու այծեր են քայլում, բայց հայերն ադրբեջանական հուշարձանների դեմ վանդալական գործողություններ չեն իրականացրել։
Թեյմուրխանի հայտարարությունը խիստ բացասական արձագանքի է արժանացել սոցիալական կայքերի ադրբեջանական տիրույթում։
Կան մի շարք ապացույցներ, որ ադրբեջանական գերեզմանատները մինչև այժմ պահպանվում են Արցախի տարածքում։ Այդ փաստի ականատեսն է դարձել նաև Sputnik Արմենիայի նկարահանող խումբը, որը քառօրյա պատերազմի ժամանակ մեկնել է Արցախ ու նկարահանել Հադրութի շրջանում գտնվող ադրբեջանական գերեզմանոցը։