ԵՐԵՎԱՆ, 23 փետրվարի — Sputnik. Ֆրանսիայի նախագահ Էմանուել Մակրոնը թույլ չի տա գինի դասել թունդ ալկոհոլի հետ նույն շարքում։ Այդ մասին նա հայտարարել է ուրբաթ մամուլի ասուլիսի ժամանակ, հաղորդում է ՌԻԱ Նովոստին՝ հղում անելով France Info ռադիոկայանին։
«Հասարակության առողջությունը վտանգված է, որովհետև երիտասարդներն ավելի շատ են հարբում թունդ ալկոհոլով և գարեջրով, բայց գինու դեպքում դա այդպես չէ։ Անձամբ ես գինի եմ խմում ցերեկը և երեկոյան», — ասել է Մակրոնը մամուլի ասուլիսի ժամանակ։
Նա հավելել է, որ իր նախագահության օրոք թույլ չի տա ալկոհոլային և ծխախոտային օրենսդրությունը խստացնող ոչ մի ուղղում կատարել։
Ֆրանսիայում ալկոհոլային օրենսդրության խստացման բանավեճը սկսվել է փետրվարի սկզբին, երբ երկրի առողջապահության նախարար Անյես Բուզինը հայտարարել է, որ գինու ինդուստրիան ստիպում է հավատալ, որ գինին տարբերվում է մյուս ալկոհոլային խմիչքներից և օժտված է մի շարք օգտակար հատկություններով՝ չնայած հանրության առողջության տեսանկյունից գինի խմելը նույնն է, ինչ գարեջուր, օղի կամ վիսկի խմելը:
Այդ հայտարարությանն ի պատասխան՝ Ժան Ռոբերտ Պիտը, գրող Բեռնար Պիվոն, ուռուցքաբան Դավիթ Կայան և Ֆրանսիայի Գինու ակադեմիայի տասնյակ անդամներ Figaro թերթում հոդված են հրապարակել, որում կոչ են արել Ֆրանսիայի առողջապահության նախարարին «դադարել սատանայացնել գինին, որը ֆրանսիական քաղաքակրթության մաս է»։
Մակրոնը դեռ նախընտրական քարոզարշավի ընթացքում հանդես է եկել ավանդական ֆրանսիական խմիչքի պաշտպանությամբ` ընդգծելով, որ «գինին կարմիր թելով անցնում է Ֆրանսիայի գրականության, կինեմատոգրաֆի և կոլեկտիվ գիտակցության միջով, ու ֆրանսիական սեղանի մաս է։