ԵՐԵՎԱՆ, 22 փետրվարի —Sputnik. Երևանի ոստիկանները գտել են Երևանի պոլիկլինիկաներից մեկում գողություն կատարած անձին ու գողոնը։ Այս մասին հայտնում է ոստիկանության մամուլի ծառայությունը։
Երևանի պոլիկլինիկաներից մեկի բժիշկը փետրվարի 17-ին զանգել է ոստիկանություն և հայտնել, որ նախորդ օրը կամ երեկոյան բացել են իր աշխատասենյակի պատուհանը և գողացել տարբեր իրեր:
Օպերատիվ խումբը դեպքի վայրում արձանագրել է, որ կասկածյալը ծառի ճյուղերով և առաջին հարկի ճաղավանդակներով բարձրացել է երկրորդ հարկ, տեխնիկական միջոցների օգնությամբ բացել պատուհանն ու գողացել հեռուստացույց, նոթբուք, տեսախցիկ, ֆոտոխցիկ, օբյեկտիվ և մակրոլուսարձակ:
Դեպքից 3 օր անց ոստիկանները գողությունը կատարելու կասկածանքով ոստիկանության Նոր Նորքի բաժին բերման են ենթարկել 45-ամյա Արման Խաչատրյանին: Նրա նկուղում հայտնաբերվել է գողոնը: