ԵՐԵՎԱՆ, 22 փետրվարի — Sputnik. Ադրբեջանից բռնագաղթած բազմաթիվ հայ փախստականներն ու նրանց ժառանգներն արդար դատի են սպասում։ Սումգայիթի դեպքերի 30-ամյա տարելիցին նվիրված խորհրդարանական լսումների ժամանակ այս մասին ասաց ԱԺ նախագահ Արա Բաբլոյանը։
Արցախի հայերի ազատագրական շարժման վերաբերյալ Ադրբեջանի իշխանությունների արձագանքը զարմանալի չէր, եթե հաշվի առնենք հայերի հանդեպ ունեցած վաղեմի ատելությունը։ 30 տարի առաջ` 1988-90 թթ., այն կրկին ամբողջությամբ բացահայտվեց:
Սումգայիթում, Բաքվում, Կիրովաբադում, Մինգեչաուրեում հազարավոր հայերի նկատմամբ իրականացված ցեղասպանական գործողությունները քաղաքակիրթ աշխարհի համար չպետք է մնան որպես պատմության անցած ու փակված էջեր: Դրանք պատշաճ քաղաքական, իրավական ու բարոյական գնահատականի չեն արժանացել միջազգային հանրության և համապատասխան ատյանների կողմից:
«Մեր ժողովուրդը, անշուշտ, իր գնահատականն ու պատասխանը տվել է Արցախի ազատագրումով, ինքնիշխանության հռչակումով, անկախ պետություն կառուցելով: Սումգայիթի և Բաքվի հայկական ջարդերը սպասում են իրենց լիարժեք գնահատականին, իսկ Ադրբեջանից բռնագաղթած բազմաթիվ հայ փախստականները և նրանց ժառանգները` արդար դատի», — ասաց Բաբլոյանը։
Սումգայիթյան ջարդերի զոհերի թիվը մինչև այսօր էլ հստակ չէ։ Պաշտոնական տվյալով` մահացել է 26 մարդ, սակայն բազմաթիվ վկայությունների համաձայն` երեք օրվա ընթացքում մի քանի հարյուր հայ է մահացել։