ԵՐԵՎԱՆ, 20 փետրվարի — Sputnik. «Գարդասիլով» պատվաստումները Հայաստանում սպասվածից դանդաղ են ընթանում։ Պատճառը պատվաստումների ծրագրին զուգահեռ տարվող հակաքարոզչությունն էր։ Այս մասին Sputnik Արմենիային ասաց ՀՀ առողջապահության նախարարության Իմունականխարգելման ազգային ծրագրի ղեկավար Գայանե Սահակյանը։
«Ցավոք, բնակչությունը տրվեց բազում բացասական կոչերին, թե իբր պատվաստումն առաջացնում է հաշմանդամություն, չբերություն, որոնք ապացուցված չեն։ Ցավում եմ, որ ոչ մասնագետ, անպատասխանատու մարդկանց պատճառով մեր երկրում այդ շատ կարևոր գործընթացը դանդաղեց, և մենք այսօր լրացուցիչ ջանքեր ենք գործադրում, որ բնակչության մտավախությունները փարատենք»,- ասաց նա։
Արգանդի վզիկի քաղցկեղ առաջացնող պապիլոմա վիրուսի դեմ առ այսօր հանրապետության ամբողջ տարածքում պատվաստվել է շուրջ 260 աղջիկ երեխա, ինչը ակնկալվող ցուցանիշից բավականին ցածր է։
«Այն աղջիկները, որոնք պատվաստվել են, իրենց շատ լավ են զգում։ Հետպատվաստումային ոչ մի դեպք չենք արձանագրել։ Նույնիսկ տեղային ռեակցիա չի գրանցվել, այն դեպքում, երբ առողջապահության համաշխարհային կազմակերպության տվյալներով, պատվաստումների 80%-ի դեպքում տեղային ռեակցիաներ են դիտվում»,- ասաց Սահակյանը։
Մարդու պապիլոմավիրուսային վարակի դեմ «Գարդասիլ» պատվաստանյութով պատվաստումները Հայաստանում պաշտոնապես մեկնարկել են 2017թ-ի դեկտեմբերի 11-ից։ Թիրախային խումբ են ընտրվել 13 տարեկան աղջիկները, քանի որ պատվաստումը պետք է կատարվի մինչև առաջին սեռական հարաբերությունը։
Պատվաստումն իրականացվում է կամավորության սկզբունքով։ Հրաժարվելու դեպքում ծնողը պետք է ներկայանա պոլիկլինիկա և ձեռագիր հրաժարական գրի` հավաստելով, որ իրազեկված է հնարավոր հետևանքների մասին։
Հայաստան ներկրված «Գարդասիլ» պատվաստանյութն ամերիկյան արտադրության է, արտադրվել է 2016 թ-ին` երեք տարի պիտանիության ժամկետով։ Նախարարության հավաստմամբ, պատվաստանյութի ամբողջ խմբաքանակը մինչ Հայաստան ներկրվելը լաբորատոր փորձաքննություն է անցել Նիդեռլանդներում: