ԵՐԵՎԱՆ, 16 փետրվարի — Sputnik. Ստամբուլում շարժասանդուղքներից մեկի վերևում հարմար տեղավորված կատուն հիացրել է տասնյակ հազարավոր մարդկանց։ Facebook-ի Aww Station էջը տեսանյութ է հրապարակել, որում երևում է` ինչքան զգուշորեն են մարդիկ շրջանցում կատվին։
Երկու օրվա ընթացքում տեսանյութը 47 հազար «հավանության» է արժանացել ու դիտվել ավելի քան 2,5 միլիոն անգամ։
«Կուզենայի ինձ էլ այս կատվի նման վերաբերվեին» — գրել է օգտատերերից մեկը։
Ոմանք կատվին իրենց տնային կենդանիների հետ են համեմատել, իսկ ոմանք ել գրել են` կատուն հենց այսպիսին պետք է լինի։
«Կվերցնեի ու կգրկեի նրան», — գրել է օգտատերերից մեկը։
Հիացական մեկնաբանությունները գնալով շատանում են։ Նյութը գրելու պահին հրապարակումը 22 հազար մեկնաբանություն ուներ։