ԵՐԵՎԱՆ, 16 փետրվարի — Sputnik. Երեկ Դավթաշենի կամրջի տակ հայտնաբերված մայրն ու աղջիկը մահացել են 2 օր առաջ։ ՀՀ քննչական կոմիտեն նոր փաստեր է հրապարակել։
Մոր և դստեր մահվան՝ էական նշանակություն ունեցող հանգամանքները պարզելու համար նշանակվել են դատաբժշկական փորձաքննություններ, որոնց եզրակացությունները դեռ չեն ստացվել։ Այսօր կատարվել է դիահերձումը, որի արդյունքներով դատաբժիշկները հայտարարել են, որ նրանց մահը վրա է հասել հերձման պահից 48 ժամ և ավելի առաջ՝ ստացած բազմաթիվ վնասվածքներից։
Քրեական գործով պարզվել է նաև, որ փետրվարի 13-ի երեկոյան՝ ժամը 20-ի սահմանում, 37 տարեկան կինը 9 տարեկան դստեր հետ այցելել է «Տաշիր Պիցցայի» Դավթաշենի մասնաճյուղ, պիցցա պատվիրել, վերցրել այն և դուրս եկել։
Քննչական կոմիտեն հայտնում է, որ քննիչներն այժմ այդ տարածքում տեղադրված արտաքին տեսանկարահանող սարքերի միջոցով փորձում են պարզել նրանց երթուղին։
Ի դեպ, քննչական կոմիտեի տվյալներով, մոր և դստեր անհետ կորելու վերաբերյալ ահազանգը ոստիկանությունը ստացել է նույն օրը`փետրվարի 13-ին, ժամը 22։25-ին։
Արաբկիրի քննչական բաժնում նախաքննությունը շարունակվում է։
Հիշեցնենք, որ երեկ`փետրվարի 15-ին, Երևանի Դավթաշենի կամրջի տակ՝ հողածածկ հատվածում, հայտնաբերվել էին երիտասարդ կնոջ և երեխայի դիակներ։ Ավելի ուշ պարզվել էր, որ մահացածները մայր ու դուստր են, որոնք, ըստ նախնական վարկածի, նետվել են կամրջից։