ԵՐԵՎԱՆ, 14 փետրվարի — Sputnik. Գավառի ծննդատան բժիշկների հայտնած տեղեկությունից հետո տղամարդը հեռախոսով հարվածել է ընդունարանի բուժքրոջը։ Այս մասին հայտնում է shamshyan.com-ը։
Ըստ կայքի` այսօր՝ փետրվարի 14-ին, ժամը 02։00-ի սահմաններում Ոստիկանության Գավառի բաժինը Գավառի բժշկական կենտրոնից ահազանգ է ստացել, որ մի քաղաքացի ընդունարանում վիճաբանել է բուժքրոջ հետ և ձեռքին եղած հեռախոսով հարվածել նրան։
Ոստիկանները պարզել են, որ ահազանգը տվել է բուժքույրը`Գավառ քաղաքի Ազատության փողոցի բնակիչ, 41-ամյա Նելա Վարդանյանը։
Նախնական տեղեկություններով` պատճառը եղել է այն, որ Ա. Հակոբյանն իր հղի կնոջը տեղափոխել է Գավառի բժշկական կենտրոնի ծննդատուն, որտեղ էլ որոշ ժամանակ անց ամուսնուն տեղեկացրել են, որ պտուղը մահացած է, իսկ կնոջն էլ վիրահատել են։
Ամուսինն էլ, այլ ելք չունենալով, ծննդատնից իջել ու բարկությունը թափել է ընդունարանի քրոջ վրա։
Փաստի առթիվ Ոստիկանության Գավառի բաժնի հետաքննչական բաժանմունքում հետաքննիչ Վանիկ Վարդանյանի կողմից նյութեր են նախապատրաստվում։