ԵՐԵՎԱՆ, 12 փետրվարի — Sputnik. Ազգային վիճակագրության ծառայության` գնաճի վերաբերյալ տվյալներն իրատեսական են, բայց չի բացառվում, որ թանկացումները կշարունակվեն մինչև ամառ։ Տնտեսագետ Ատոմ Մարգարյանն այս մասին ասաց Sputnik Արմենիայի հետ զրույցում։
Տնտեսագետի կարծիքով` հատկապես սննդամթերքի շուկայում թանկացումները հունվարով չեն սահմանափակվի, և կշարունակվեն նաև առաջիկա ամիսներին։ Մինչև մայիս-հունիս սննդամթերքի շուկայում լուրջ բարելավում մասնագետը չի կանխատեսում։
«Տրադիցիոն ապրանքները, հատկապես` մսամթերքը, կարագը ոչ միայն չեն էժանանում, այլև վերջին շրջանում հատկապես մսամթերքի թանկացման նոր միտումներ կան։ Կուտակված պաշարներ չկան, գյուղատնտեսությունը, հատկապես անցյալ տարվա անբարենպաստ պայմաններից հետո շարունակում է անկումը»,- ասում է Մարգարյանը։
2018թ. հունվարին Հայաստանում գրանցված համատարած գնաճը հայ վիճակագիրները գնահատել են 2.7%։ Ազգային վիճակագրական ծառայությունը հրապարակել է հունվար ամսվա սպառողական գների ինդեքսը, որի համաձայն` սննդամթերքն ու ոչ ալկոհոլային խմիչքները թանկացել են 5.7%-ով։ Ամենաշատը` 25.11%-ով թանկացել են միրգը, բանջարեղենը և վառելիքը` 11.2%-ով։
Մսամթերքը հունվարին նախորդ ամսվա համեմատ թանկացել է 2%-ով, կաթնամթերքը, պանիրը, ձուն` 0.5%-ով, ոչ ալկոհոլային խմիչքը, սուրճը, թեյն ու կակաոն`0.2%-ով։
Հրուշակեղենի, ալկոհոլային խմիչքի ու ծխախոտի գները մնացել են անփոփոխ, իսկ շաքարավազն ու կարագն էժանացել են` համապատասխանաբար` 0.4 և 1%-ով։
Ատոմ Մարգարյանը խորհուրդ տվեց ուշադրություն դարձնել հատկապես տրանսպորտային ծառայությունների վրա, որոնք պաշտոնական վիճակագրական տվյալների համաձայն` էապես թանկացել են։
«2018թ-ի հունվարին 2017-ի դեկտեմբերի նկատմամբ տրանսպորտային ծառայությունները թանկացել են 6%-ով, 2017-ի հունվարի նկատմամբ` 12%։ Աննախադեպ, փաստորեն, երկնիշ տոկոսով աճ է եղել տրանսպորտի ծառայությունների ոլորտում։ Հասկանալի է, որ դա անմիջապես ազդել է նաև ուղևորափոխադրումների, բեռնափոխադրումների արժեքի վրա»,- ասաց տնտեսագետը։
Նշենք, որ պաշտոնական տվյալներով`բենզինը Հայաստանում 2018թ-ի հունվարին 2017-ի դեկտեմբերի համեմատ թանկացել է 5.4%-ով, դիզվառելիքը` 16.3%, ավտոմեքենաների լիցքավորման գազը` 11.8%-ով։
Այդուհանդերձ, գնաճ մեր երկրում առայժմ տարվա կտրվածքով կանխատեսվածի նվազագույն շեմին է։ Հիշեցնենք, որ այս տարվա համար ՀՀ կառավարությունն առավելագույնը 4+-1.5% գնաճ է կանխատեսել։
Գնաճի առումով Հայաստանը տարածաշրջանում միակը չէ։ Տնտեսագետի խոսքով` տարածաշրջանի մի շարք երկրներում ևս հունվարին բավական շոշափելի թանկացումներ են տեղի ունեցել։ Ըստ նրա` ՌԴ-ում Հայաստանի համեմատ գրեթե նույն չափով գնաճ է գրանցվել`2- 2.5%, Բելառուսում` 4.6, Ղազախստանում` 7.1, իսկ ամենամեծ գնաճը տարածաշրջանի երկրներից գրանցվել է Թուրքիայում` շուրջ 12 %։
Հայաստանում հունվարին գրանցված գնաճը մեծապես պայմանավորվում է Հարկային օրենսգրքի փոփոխություններով, որի արդյունքում հունվարի 1-ից ավելացել են ակցիզային հարկի դրույքաչափերը։ Խորհրդարանական ընդդիմությունը պահանջում է գնաճը կանխելու համար վերադառնալ մինչև հունվարի 1-ը գործող դրույքաչափերին։ Ընդդիմության այս առաջարկը խորհրդարանը կքննարկի փետրվարի 16-ին հրավիրված արտահերթ նիստում։