ԵՐԵՎԱՆ, 12 փետրվարի — Sputnik. Թուրքիայի քրդամետ Ժողովուրդների դեմոկրատական կուսակցության առաջնորդ Սելահաթին Դեմիրթաշը «Արդարություն և զարգացում» իշխող կուսակցությանը մեղադրել է Թուրքիայում ֆաշիստական ռեժիմ ստեղծելու փորձի մեջ։ Իշխող կուսակցության առաջնորդը Թուրքիայի գործող նախագահ Ռեջեփ Թայիփ Էրդողանն է։
Այս մասին նշվում է Դեմիրթաշի ուղերձում, որն ուղղված էր Անկարայում փետրվարի 11-ին կայացած կուսակցության համագումարի մասնակիցներին։ Ինչպես հայտնում է Parstoday-ը, Դեմիրթաշը հայտարարել է, որ շարունակելու են ազգային պատկանելության խտրականության դեմ պայքարը։
Թուրքիայի քրդամետ Ժողովուրդների դեմոկրատական կուսակցության համագումարի ժամանակ երկու նոր համանախագահ է ընտրվել. Սելահաթին Դեմիրթաշի և Ֆիգեն Յուքսեքդաղի փոխարեն իշխանությունը կգլխավորեն Փերվին Բուլդանը և Սեզայի Թեմելին, հայտնում է Newsturk-ը։ Պաշտոնական առաջին հայտարարություններում նրանք նշել են, որ կուսակցության բռնած ուղին անփոփոխ է լինելու։
Խորհրդարանում պատգամավորների թվով (59) երրորդ տեղը զբաղեցնող կուսակցությունն իսկապես չի փոխել իր դիրքորոշումն այն հարցում, որ կուսակցությունը պետք է գլխավորեն երկու հոգի` կին և տղամարդ։
Հիշեցնենք, որ Դեմիրթաշն ու Յուքսեքդաղը, խորհրդարանի հինգ պատգամավոր, ինչպես նաև մի քանի տասնյակ քաղաքապետ և Թուրքիայի քրդամետ Ժողովուրդների դեմոկրատական կուսակցության շրջանային ղեկավարներ կալանավորվել էին անցած երկու տարիների ընթացքում ահաբեկչությանն աջակցելու մեղադրանքով։