ԵՐԵՎԱՆ, 10 փետրվարի — Sputnik. Գյումրեցի Սաթենիկ Գևորգյանը «Ты супер!» նախագծի` այսօր մեկնարկած նոր եթերաշրջանում երգեց «Զեփյուռ կդառնամ» գուսանական երգը։ Նրա ելույթից հետո, երբ ժյուրիի 4 անդամներն էլ որպես հավանության նշան սեղմեցին կանաչ կոճակը, Սաթենիկի հասցեին գովեստի խոսքեր հնչեցին։
«Քո երգն էլ էր զեփյուռի նման։ Գուցե այնքան էլ մրցութային երգ չէր, բայց բավական էր, որ ես հասկանայի` դու լավ լսողություն ունես»,- ասաց երգիչ Սերգեյ Լազարևը։
«Մենք լողացինք քո ձայնի մեջ»,- ասաց երգչուհի և հաղորդավարուհի Յուլյանա Կարաուլովան` հատուկ ընդգծելով աղջկա համեստությունը։
Նախագծին մասնակցում են 8-18 տարեկան 82 երեխա 13 երկրից։ Մասնակիցները Մոսկվա են մեկնել Ռուսաստանի տարբեր անկյուններից, ԱՊՀ և Բալթյան երկրներից` Հայաստանից, Ադրբեջանից, Բելառուսից, Ղազախստանից, Լատվիայից, Մոլդովայից, Տաջիկստանից, Ուզբեկստանից, Էստոնիայից և Հարավային Օսեթիայից, ինչպես նաև Գերմանիայից և Սիրիայից։
Ինչպես և անցած տարի, հաղորդավարը Վադիմ Տակմենևն է, իսկ աստղային ժյուրիի կազմում ընդգրկվել են ռուս կոմպոզիտոր և երաժշտական պրոդյուսեր Վիկտոր Դրոբիշը, հայտնի երգիչ Սերգեյ Լազարևը, էստրադային երգչուհի և հաղորդավարուհի Յուլյանա Կարաուլովան, Ռուսաստանի ժողովրդական արտիստ Իգոր Կրուտոյը։