ԵՐԵՎԱՆ, 10 փետրվարի — Sputnik. Հայ դահուկորդներն այժմ օլիմպիական մրցուղիներում նախապատրաստվում են իրենց մեկնարկներին և շատ են ուզում հետք թողնել օլիմպիական պատմության մեջ:
Դահուկավազքի Հայաստանի հավաքականի մարզիչ Արթուր Միքայելյանը մեծ ափսոսանք հայտնեց, որ օլիմպիական խաղերին վնասվածքի պատճառով չի մասնակցում ավագ որդին՝ Սերգեյ Միքայելյանը։
«Սերգեյը օլիմպիական խաղերում կարող էր աննախադեպ բարձր արդյունքի հասնել, քանի որ արդեն մեծ փորձ ունի և լավ արդյունքներ էր ցույց տալիս»: Կրտսեր որդին՝ Միքայել Միքայելյանը, առաջին անգամ է մասնակցում օլիմպիական խաղերին ու շատ երիտասարդ է, բայց նրա մարզումներից զգացվեց, որ նա նույնպես անելու է ամեն ինչ բարձր արդյունքների հասնելու համար:
Օլիմպիական խաղերի բացման արարողությունից հետո Հայաստանի պատվիրակության դրոշակակիրը պատմեց, թե ինչ է զգացել, երբ հայտարարվել է հայ մարզիկների մուտքը։
«Ես մեծ հպարտություն զգացի, երբ հայտարարեցին` Armenia, և մենք մտանք մարզադաշտ: Շատ ուրախ եմ, որ մասնակցում եմ օլիմպիական խաղերին։ Անելու եմ հնարավորը լավ արդյունքի հասնելու համար: Միակ խնդիր այն է, որ դեռ լիովին չեմ ադապտացվել ժամային գոտուն, բայց մինչև մեկնարկ, կարծում եմ, այդ խնդիրը կլուծվի»,- ասաց նա:
Կատյա Գալստյանը նույնպես ակտիվ մարզումներ է անցկացնում օլիմպիական վազքուղիներում: Ի տարբերությունը իր թիմակցի` Կատյան օլիմպիական խաղերի մասնակցության փորձ ունի: Սոչի-2014-ում հայ դահուկորդուհին բարձր տեղ չզբաղեցրեց` գրավելով 64-րդ տեղը դասական ոճով 10 կմ մրցատարածությունում: Հիմա հայ դահուկորդուհին համոզված է, որ բարելավելու է իր ցուցանիշը։
«Պարզ է, որ օլիմպիական խաղերում հանդես են գալու շատ ուժեղ դահուկորդուհիներ, ու դժվար է լինելու բարձր տեղ զբաղեցնելը: Բայց ինչպես բոլորը, ես էլ եմ ուզում հպարտանալ իմ արդյունքով ու ամեն ինչ անելու եմ հայ երկրպագուներին ուրախացնելու համար»,- ասաց նա:
Անկեղծ ասած, ոչ ոք հայ դահուկորդներից մեծ արդյունքներ չի ակնկալում: Սակայն մեր երկու դահուկորդներն էլ նշում են, որ Օլիմպիական խաղերին չեն մասնակցում միայն օլիմպիական սկզբունքով: Կարևորը միայն մասնակցությունը չէ, շատ կարևոր է նաև հետք թողնել օլիմպիական խաղերի պատմության մեջ, իսկ դա կարելի է անել միայն լավ արդյունքով: Ահա այս են միաբերան նշում մեր հավաքականի երկու դահուկորդները՝ Միքայել Միքայելյանը և Կատյա Գալստայանը: Իսկ թե ինչքանով կհաջողվի պատմություն գրել, կհասկանանք մոտակա օրերին:
Փհենչհանի օլիմպիական խաղերում Հայաստանի թիմից առաջինը կմեկնարկի Կատյա Գալստյանը: