ԵՐԵՎԱՆ, 8 փետրվարի — Sputnik. 23-րդ ձմեռային օլիմպիական խաղերի բացման հանդիսավոր արարողության ժամանակ Հայաստանի դրոշը կտանի դահուկավազորդ Միքայել Միքայելյանը։ Այս մասին հայտնում է Հայաստանի ազգային օլիմպիական կոմիտեի մամուլի ծառայությունը։
Հայկական պատվիրակության կազմում օլիմպիական շքերթին կմասնակցեն նաև պատվիրակության ղեկավար Գագիկ Բոլշիկյանը, օլիմիպիականներ Կատյա Գալստյանը, Աշոտ Կարապետյանը, դահուկավազքի և լեռնադահուկային սպորտի Հայաստանի հավաքականների մարզիչներ Արթուր Միքայելյանն ու Սեյրան Հարությունյանը, և Հայաստանի դահուկային սպորտի ֆեդերացիայի գլխավոր քարտուղար Գագիկ Սարգսյանը:
23-րդ ձմեռային օլիմպիական խաղերի մեկնարկը կտրվի փետրվարի 9-ին, Երևանի ժամանակով 15:00-ին:
1998 թվականի ձմեռային օլիմպիադայում Հայաստանի դրոշը տարել է Միքայելի մայրը` Ալլա Միքայելյանը, իսկ Սոչիում անցկացված օլիմպիական խաղերի ժամանակ` նրա եղբայրը` Սերգեյ Միքայելյանը։