ԵՐԵՎԱՆ, 8 փետրվարի — Sputnik. Հարկային գործիքով գների վրա ազդելը ՀՀ ֆինանսների նախարար Վարդան Արամյանը ճիշտ չի համարում։ Այսօր լրագրողների հետ ճեպազրույցում, անդրադառնալով գնաճը Հարկային օրենսգրքի փոփոխություններով զսպելու վերաբերյալ «Ելք» դաշինքի առաջարկին, այս մասին ասաց նախարարը։
«Հարկային օրենսգիրքը քննարկելիս մենք, իհարկե, հաշվի առել ենք ակցիզային հարկի բարձրացման ազդեցությունը գների վրա, և դա գնահատված է 0.5 տոկոսային կետով։ Հարկային գործիքով որևիցե արտոնություն տալը կամ գների հետ կապված մանիպուլյացիաներ անելը, իմ կարծիքով, ճիշտ չէ»,- ասաց Արամյանը` հավելելով, որ Հարկային օրենսգիրքն այն գործիքը չէ, որով հնարավոր կլինի աջակցել հանրության սոցիալապես անապահով խմբերին։
Ինչ վերաբերում է ակցիզային հարկին, այն, նախարարի խոսքով, տարածաշրջանում առանց այդ էլ ամենացածրն է։ «Վրաստանում ակցիզային հարկերը գրեթե երկու անգամ ավելի բարձր են, քան մեզ մոտ»,- ասաց նա։
Գնաճը մեղմելու առավել արդյունավետ միջոց ֆինանսների նախարարը համարում է գյուղատնտեսության ոլորտում սուբսիդավորման ծրագրերի իրականացումը, որի մասին ՀՀ վարչապետն արդեն հանձնարարականներ է տվել կառավարության անդամներին։
Հիշեցնենք, որ ԱԺ «Ելք» խմբակցությունը նախաձեռնել է խորհրդարանի արտահերթ նիստ, որում առաջարկում է քննարկել Հարկային օրենսգրքում փոփոխություններ կատարելու մինչև հունվարի 1-ը գործող նախկին Հարկային օրենսգրքին վերադառնալու հարցը։