ԵՐԵՎԱՆ, 3 փետրվարի — Sputnik. Ամերիկացի լրագրող Բիլլի Կաուֆմանը հոդված է հրապարակել հայերի մասին։ Նա կարծում է, որ հայ ժողովրդին թերագնահատում են ու նրա ձայնը չեն լսում:
Հեղինակը բողոքում է, որ նույնիսկ Հայաստանի և հայերի հետ այս կամ այն առնչություն ունեցող ֆիլմերն են ձախողվում:
«Բացառություն չէր նույնիսկ Ատոմ Էգոյանի «Արարատը» կամ Օսմանյան կայսրությունում Հայոց ցեղասպանության մասին պատմող «Խոստում» ֆիլմը», — գրում է Կաուֆմանը The American Conservative պարբերականում հրապարակված «An Armenian Rhapsody» հոդվածում:
Հեղինակի խոսքով` կինոարտադրությունն անտեսեց անցյալ տարվա մեծ նախագիծը։
«Գրողը տանի, նույնիսկ Կամբոջայի The Killing Fields-ն անուշադրության չմատնվեց: Այս ամենը մի պարզ պատմական ճշմարտություն է ցույց տալիս. ոչ ոքի չի հուզում այն ամենը, ինչ վերաբերում է հայ ժողովրդի ճակատագրին», — գրում է հրապարակախոսը:
Կաուֆմանը հայերի նկատմամբ դրսևորած անտարբերության օրինակ է համարում ամերիկահայ գրող Վիլյամ Սարոյանին, որը, նրա խոսքով, կյանքի օրոք ըստ արժանվույն չգնահատվեց: Հեղինակը խոստովանում է, որ ինքը հայերի պատմությամբ հետաքրքրվել է միայն հայ կնոջ հետ ամուսնանալուց հետո:
«Ես մինչ օրս մեղավոր եմ զգում Ֆրանց Վերֆելի «Մուսա լեռան 40 օրը» չկարդալու համար», — նշում է նա:
Հրապարակախոս Բիլ Կաուֆմանը խոստովանել է, որ հայերն իրեն «օտար» են անվանում, բայց դա չի խանգարում ազգանվան մեջ «յան» վերջավորություն ունեցող սիրելի մարդու հետ կապը զգալու համար: Հայտնի գրողը համարում է, որ բոլոր հայերն իր «հայրենակիցներն» են: