ԵՐԵՎԱՆ, 2 փետրվարի — Sputnik. Հայաստանում 2018 թվականին խաղողը կարող է չբավականացնել գինու համար։ Այսօր լրագրողներին այս մասին ասաց Հայ գինեգործների միության նախագահ Ավագ Հարությունյանը։
Նրա խոսքով` պատճառները երկուսն են`կարճաժամկետ և երկարաժամկետ։
Կարճաժամկետ. այս տարի հանրապետությունում ձյան քանակը քիչ է եղել։ Այդ պատճառով էլ գարնանը ոռոգման ջրամբարներում կարող է ջուր չհավաքվել։
Երկարաժամկետ. Հայաստանում վերջին տարիներին գնալով ավելի շատ գինի են սկսել արտադրել։ Կոնյակ արտադրողները հասկացան, որ գինուն պետք է նայել ոչ թե մատների արանքով, այլ որպես դիվերսիֆիկացիայի լավ աղբյուր և որպես պահուստային շատ լավ տարբերակ։
Արդյունքում վերջին հինգ տարիներին Հայաստանում գինեգործությունը զգալի ընդլայնվել է։ 4-5 տարի առաջ հանրապետությունում 6 — 6,5 հազար լիտր գինի էին արտադրում, իսկ 2017 թվականի ընթացքում արտադրել են 8,8 հազար։
Սակայն լավ գինին ավելի «պահանջկոտ» է խաղողի նկատմամբ, քան կոնյակը։ Իսկ Հայաստանի խաղողի «զամբյուղում» նման խաղողը 10%-ից պակաս է կազմում, քանի որ խաղողագործությունը մեզ մոտ միշտ կոնյակի համար էր «աշխատում»։
«Այդ պատճառով լավ խաղողը չէր բավարարում։ Իսկ եթե սրան գումարենք ոռոգման բացակայությունը, կստացվի, որ աշնանը գինի և կոնյակ արտադրելու համար մեզ կարող է 30-40 հազար տոննա խաղող չբավականացնել։ Սև տեսակներ կարող են ընդհանրապես չլինել», — ասաց Հարությունյանը։
Բնականաբար, սա վատագույն սցենարն է, բայց վախենալու հիմքեր կան, ընդգծեց գինեգործը։