ԵՐԵՎԱՆ, 2 փետրվարի — Sputnik. Ռուսաստանի վարչապետ Դմիտրի Մեդվեդևն ԱՊՀ-ի իր գործընկերներին խորհուրդ է տվել փող կուտակել թվայնացման համար։ ՌԴ վարչապետն խորհուրդները տվել է Ղազախստանում` Ալմաթիում ընթացող «Թվային օրակարգը գլոբալիզացման դարաշրջանում» համաժողովի ընթացքում։ Այս մասին հայտնում է Sputnik Ղազախստանը։
«Հարգելի գործընկերներ, ուզում եմ, որ վարչապետներն ու նրանց պատվիրակությունները երկնքից իջնեն և իրական հողի վրա կանգնեն։ Այն, ինչ հիմա քննարկվում է, ես նկատի ունեմ ինտերնետը և հինգերորդ սերնդի կապն ու ենթակառուցվածքը, որի մասին խոսել են գործընկերները, բոլորը շատ թանկ տեխնոլոգիաներ են. փող կուտակեք», — ասել է Մեդվեդևը։
Ռուսաստանի կառավարության ղեկավարն ավելացրել է, որ քաղաքակրթության դարաշրջանում պետք է հատուկ ուշադրություն դարձնել անվտանգության հարցերին։ Նրա խոսքով` «մասնավոր կյանք» հասկացությունը երկրորդ պլան է մղվում։
Մեդվեդևը հոռետեսորեն է խոսել թվային արժույթների նկատմամբ։ Նրա խոսքով` կրիպտոարժույթները կարող են «օճառի պղպջակ» լինել։
«Մեզանից ոչ ոք չգիտի, թե կպահպանվեն արդյոք այդ կրիպտոարժույթները։ Իսկապե՞ս դա ունիվերսալ վճարային միջոց է, որը մրցակցություն կկազմի ստանդարտ արժույթների համար։ Թե՞ պղպջակ է, որը կպայթի, և դրանից ոչինչ չի մնա», — ասել է նա։
Միաժամանակ ՌԴ վարչապետը համոզմունք է հայտնել, որ բլոկչեյնի տեխնոլոգիան ֆունդամենտալ առաջընթաց է։ Նրա խոսքով` այն մեծ ապագա ունի։
Ալմաթիում անցկացվող միջոցառմանը մասնակցում են Ղազախստանի, Հայաստանի, Բելառուսի, Ղրղըզստանի, Ռուսաստանի, Ուզբեկստանի վարչապետները, Ադրբեջանի և Տաջիկստանի պաշտոնական պատվիրակությունները, ինչպես նաև ՏՏ խոշոր ընկերությունների ներկայացուցիչներ։