ԵՐԵՎԱՆ, 1 փետրվարի — Sputnik. Ռուսաստանը հույս ունի, որ արցախյան հակամարտության գոտում ԵԱՀԿ դիտորդական առաքելության ընդլայնման մասին պայմանավորվածությունը շուտափույթ լուծում կստանա։ Այդ մասին հայտնել է ՌԴ ԱԳՆ ղեկավար Սերգեյ Լավրովը` Իտալիայի ԱԳՆ ղեկավար և ԵԱՀԿ գործող նախագահ Անջելինո Ալֆանոյի հետ Մոսկվայում տեղի ունեցած բանակցությունների արդյունքներն ամփոփող ասուլիսի ժամանակ, հայտնում է ՌԻԱ Նովոստին։
Լավրովը հիշեցրել է, որ ավելի վաղ պայմանավորվածություն էր ձեռք բերվել շփման գծում ԵԱՀԿ դիտորդական առաքելության ընդլայնման մասին։
«Կարծում եմ, որ այժմ կողմերը մոտ են այդ պայմանավորվածության իրականացմանն ուղղված կոնկրետ չափանիշների համաձայնեցմանը, և մենք հույս ունենք, որ ԵԱՀԿ–ն այն կկարողանա օպերատիվ կերպով գործի դնել», – ռուս արտգործնախարարի խոսքերն է մեջբերում ՌԻԱ Նովոստին։
Իտալացի արտգործնախարարն, իր հերթին, պատրաստակամություն է հայտնել ամեն կերպ աջակցել արցախյան հիմնախնդրի լուծման ուղիներ գտնելու համար։ «Կարծում ենք, որ ԵԱՀԿ–ն պետք է նպաստի Ռուսաստանի նման ակտիվ խաղացողի ջանքերին, որոնք ուղղված են հակամարտության խաղաղ կարգավորմանը», – նշել է Ալֆանոն։
Արցախում ԵԱՀԿ դիտորդների առաքելությունն ընդլայնելու մասին պայմանավորվածությունը ձեռք էր բերվել 2016 թվականին Հայաստանի և Ադրբեջանի նախագահների` Վիեննայում և Սանկտ Պետերբուրգում տեղի ունեցած հանդիպումների արդյունքում։ Նախատեսվում է, որ դա թույլ կտա նվազեցնել լարվածությունը հակամարտության գոտում։
Սակայն, արդյունքում, Բաքուն փաստացի հրաժարվեց կատարել ձեռք բերված պայմանավորվածությունները` համարելով, որ դրանց իրականացումը կամրապնդի ստատուս քվոն հակամարտության գոտում։