ԵՐԵՎԱՆ, 26 հունվարի — Sputnik. «Արսենալում» Հենրիխ Մխիթարյանն ավելի լավ կխաղա, քան «Մանչեսթեր Յունայթեդում»։ Այդ մասին հայտարարել է «Մանչեսթեր Յունայթեդի» գլխավոր մարզիչ Ժոզե Մոուրինյոն, հինգշաբթի հաղորդում է Daily Mail-ը։ Նրա խոսքով` Հայաստանի հավաքականի ավագի ոճն ավելի շատ է համապատասխանում «զինագործների» ոճին։
«Նա մեզ հետ կարող էր ավելի լա՞վ խաղալ։ Հնարավոր է։ Կարո՞ղ էի ես ավելի լավ օգտագործել նրա տաղանդը։ Կարո՞ղ էր նա ավելի լավ հարմարվել մեզ մոտ որոշ ժամանակ անց։ Հնարավոր է։ Բայց ես ոչնչի համար չեմ ափսոսում», — ասել է նա։
Ընդհանուր առմամբ մարզիչը համոզված է, որ Մխիթարյանին Սանչեսով փոխարինելու գործարքը շահավետ էր բոլոր կողմերին` «Արսենալին», «Մանչեսթեր Յունայթեդին» և անձամբ Մխիթարյանին։
Մոուրինյոն հայտարարել է, որ ի դեմս Մխիթարյանի ֆանտաստիկ խաղացող է կորցրել։
«Կարծում եմ, որ ֆանտաստիկ գործարք է եղել, ես ֆանտաստիկ խաղացողի եմ կորցրել, Արսեն Վենգերը ֆանտաստիկ խաղացողի է կորցրել, Ալեքսիս Սանչեսը ֆանտաստիկ ակումբից տեղափոխվել է հսկա ակումբ, իսկ Միկին տեղափոխվել է ֆանտաստիկ թիմ», — ասել է նա։
Ավելի վաղ հարցազրույցներից մեկում Մխիթարյանը խոստովանել էր, որ լինելով «Արսենալի» երկրպագու` սիրահարված է Թիերի Անրիի խաղին։
Հենրիխ Մխիթարյանի տեղափոխությունը չիլիացի կիսապաշտպան Ալեքսիս Սանչեսի` «Մանչեսթեր Յունայթեդ» տեղափոխվելու գործարքի մի մասն էր դարձել։
Մխիթարյանը «Արսենալի» կազմում հանդես է գալու 7 համար ներքո և շաբաթական 180-200 հազար ֆունտ ստեռլինգ է ստանալու։