ԵՐԵՎԱՆ, 25 հունվարի — Sputnik. Սուրբ Սարգսի օրը տարվա ամենառոմանտիկ օրերից է։ Համարվում է, որ սրբի հովանավորությունը հուսալի միջոց է կյանքի կեսին գտնելու համար։ Եթե նա բարեհաճ լինի, ապա երիտասարդների բախտն այդ տարի կբերի, և նրանք կգտնեն իրենց ապագա ամուսնուն կամ կնոջը։
Սուրբ Սարգսի օրն այս տարի կնշվի հունվարի 27-ին։
Արարատյան Հայրապետական թեմի առաջնորդանիստ Ս. Սարգիս եկեղեցու և երիտասարդական կառույցների հոգևոր հովիվ Տ. Պետրոս ավագ քահանա Մալյանը հինգշաբթի պատմեց լրագրողներին Սուրբ Սարգսի օրվա հետ կապված ավանդույթների մասին։
«Հալվա, խաշիլ, փոխինձ, աղանձ պատրաստելու գեղեցիկ ավանդույթ կա։ Ընդունված է եղել այդ ուտելիքները գիշերը դնել տների տանիքներին, որպեսզի սուրբ Սարգսի ձին սմբակի հետքը թողնի դրանց վրա», — նշեց հոգևորականը։
Հայ առաքելական եկեղեցին չի ընդունում գուշակությունները։
«Չի կարելի դա վերածել գուշակության։ Այդ գեղեցիկ տոնի ժամանակ պետք չէ գուշակել, այլ պետք է ուղղակի աղոթել, ինչ-որ բան խնդրել Աստծուց։ Եվ յուրաքանչյուրը կստանա այն, ինչին իսկապես հավատում է», — նշեց նա։
Ըստ ավանդույթի, աղի բլիթն ուտում են տոնի գիշերը։ Հավատալիքի համաձայն, այն ուտելուց հետո ով քեզ երազում ջուր տա, նա էլ կլինի քո ընտրյալը։
«Աղի բլիթը քրիստոնեական և հայկական ավանդույթ չէ։ Ուղղակի գեղեցիկ հավատալիք է չամուսնացած երիտասարդների համար», — ասաց Պետրոս քահանա Մալյանը։
Նրա խոսքով` Սուրբ Սարգսի օրը հայերի ամենասիրելի տոներից է։
Տեր Պետրոսը նշեց, որ Արարատյան թեմն արդեն 17 տարի մեծ շուքով նշում է այդ տոնը։ Եթե նախկինում նշել են միայն ՀԱԵ-ում, հիմա այն դուրս է եկել եկեղեցու սահմաններից և մտել ժողովրդի մեջ։
«Այս տարի տոնը նշվում է Բանակի օրից առաջ։ Այս տարի սրբի մասունքակիր աջը կբերվի սբ. Սարգիս եկեղեցի», — ասաց հոգևորականը։
Առավոտյան ժամը 10։00-ին Սուրբ Սարգիս եկեղեցում տեղի կունենա պատարագ, որից հետո Արարատյան թեմում կկայանա 22 զինծառայողների պարգևատրման արարողությունը։ Ժամը 14։00-ին կսկսվի խաչերթ Մաշտոցի պողոտայից, կանցնի Բաղրամյանի պողոտայով ու կավարտվի Սիրահարների այգում, որտեղ տոնական համերգ կկազմակերպվի։
Պատմությունը վկայում է, որ սուրբ Սարգիսն ապրել է մ.թ. 4-րդ դարում ու հռոմեական բանակի զորավար է եղել: Քրիստոսի հանդեպ ունեցած հավատքի ու քրիստոնեությունը քարոզելու համար հալածանքների է ենթարկվել Հռոմեական կայսրությունում, այնուհետև Պարսկաստանում: Իր որդու` Մարտիրոսի և 14 քաջ մարտիկների հետ նա նահատակվել է հանուն քրիստոնեական հավատքի: