ԵՐԵՎԱՆ, 25 հունվարի — Sputnik. Հյուսիսային Իռլանդիայի բժիշկները տասնհինգամյա տղայի ոտքը թարս են կարել։ Այս մասին հայտնում է ՌԻԱ Նովոստին` հղում անելով բրիտանական The Sun պարբերականին։
Պարբերականը նշում է, որ 2017 թվականի ամռանը Տրիստան Ստյուարտի մոտ չարորակ ուռուցք են հայտնաբերել, որի պատճառով պետք էր անդամահատել մարմնի վնասված մասը։
Սակայն վիրաբույժները առաջարկել են չկտրել ամբողջ ոտքը, այլ անդամահատել միայն սրունքը ու կարել կրունկի տեղից` թաթով հետ։ Նրանց խոսքով` այդ վիրահատության դեպքում սրունքաթաթային հոդը ծնկի հոդի դեր է կատարելու, դա կհեշտացնի պրոթեզի օգտագործումը։
The Sun –ը գրում է, որ «հեղափոխական» վիրահատությունը բարեհաջող է անցել։ Հիմա Տրիստանը քայլում է պրոթեզով առանց հենակի ու կենտրոնացած է վազել սովորելու վրա։ Ապագայում տղայի ընտանիքը մտադիր է վազքի համար նախատեսված պրոթեզներ գնել։