ԵՐԵՎԱՆ, 23 հունվարի — Sputnik. ՀՀ իշխանությունը հավանաբար կվերանայի եկամտահարկի վճարման նոր համակարգը և արմատապես կփոփոխի այն, լրագրողների հետ զրույցում ասաց Հարկային խորհրդի անդամ Վահագն Համբարձումյանը։
«Եթե 20% եկամտահարկ սահմանվի, երկրի բյուջեն 70 մլրդ դրամ կկորցնի։ Սակայն եթե դա նույնիսկ տեղի ունենա, ապա հաստատ կլինի ոչ մոտ ապագայում։ Այդ համակարգին անցում կատարելն աստիճանաբար կլինի», — ասաց Համբարձումյանն` ավելացնելով, որ իր ասածը որպես պաշտոնական հայտարարություն չի կարելի դիտարկել։
Սակայն այստեղ մեկ այլ խնդիր է առաջանում. երկրի բյուջեում 70 միլիարդանոց բացը լրացնելու համար երեք ելք կա` պարտքի ավելացում, ծախսերի կրճատում, եկամտահարկի ավելացում այլ մեխանիզմներով։ Արդյո՞ք երկիրը պատրաստ է դրան, դժվար է ասել։
Ներկայիս իրավիճակն առավել օպտիմալ է, քանի որ դրական է ազդում 279 հազարից ցածր աշխատավարձ ստացող մարդկանց բարեկեցության վրա, կարծում է մասնագետը։
«Հայաստանում վարձու աշխատողների թիվը հասնում է 600 հազարի, որոնցից 90%-ը 279 հազար դրամից քիչ աշխատավարձ են ստանում, այսինքն աշխատողների 90%-ը շահել են եկամտահարկի դրույքաչափի փոփոխությունից. նրանցից գանձվող եկամտահարկը նախկինից քիչ կլինի», — նշեց Համբարձումյանը։
Մնացած 10%-ից, որոնց աշխատավարձը գերազանցում է 279 հազար դրամը, ավելի շատ գումար կհարկվի։ 1 միլիոնից 2 միլիոն դրամ աշխատավարձի դեպքում եկամուտները կնվազեն 14.420-ից 34.420 դրամով, 2 մլն դրամ աշխատավարձ ստանալու դեպքում` 34420 դրամով։
Նախկինում 150 հազարից բարձր աշխատավարձ ստացողների եկամտային հարկը 26% էր, այժմ դառնում է 28%: Փոխարենը մինչև 150 հազար դրամ աշխատավարձերը կհարկվեն ոչ թե 24.4, այլ 23%-ով:
Նշենք,որ Հարկային նոր օրենսգիրքն ուժի մեջ է մտել հունվարի 1-ից։