ԵՐԵՎԱՆ, 22 հունվարի — Sputnik. Արագիլները դադարել են հեռանալ մեր երկրից, պատճառը կլիմայական փոփոխություններն են։ Այս մասին երկուշաբթի լրագրողներին ասաց «Թռչնասերների կենտրոն» հասարակական կազմակերպության նախագահ, բնապահպան Սիլվա Ադամյանը։
Նրա խոսքով` 2014-2015թթ-ին կենտրոնը հետազոտություն է անցկացրել Հայաստանի Սուրենավան և Արմաշ գյուղերում` հասկանալու համար, թե ինչպես են արագիլներն արձագանքում կլիմայական փոփոխություններին։
«Մեր աշխատանքների համար մենք օգտագործել ենք 200 հեկտար տարածք, որտեղ ստեղծել են բնակալման վայրեր, որպեսզի հասկանանք, թե որքանով են բնակլիմայական փոփոխություններն ազդում արագիլների վարքի վրա»,- նշեց Ադամյանը։
Մասնագետի խոսքով` պարզել են, որ արդեն մի քանի տարի է` արագիլները ձմեռում են Հայաստանում։ Թռչունները կարողանում են սնունդ հայթայթել Արարատյան դաշտում և, ըստ էության, սկսել են նստակյաց կյանք վարել։
«Ի դեպ, գյուղացիները մեզ պատմեցին, որ արագիլները սկսել են բույն հյուսել նաև Արմավիրի մարզում։ Մենք նրանց պատասխանեցինք, որ արագիլների համար դա արդեն բնական երևույթ է», — ասաց բնապահպանը։
Նրա խոսքով` ստեղծված թռչնաբները կոնկրետ դեր են խաղացել. արագիլներին պաշտպանել են էլեկտրալարերից։ Տեղի բնակիչներն ահազանգում են, որ լարերի այրման պատճառով քանդվել են արագիլների բները։
Բացի այդ, Ադամյանը խոսեց նաև Ամուլսարի լեռնարդյունաբերական ծրագրի ազդեցության մասին։
«Եթե բացահայտ խոսենք, ապա գալիք աշխատանքները կարող են երաշտի, Ջերմուկի անապատացման, ինչպես նաև ջրի որակի փոփոխության պատճառ դառնալ»,- նշեց նա։
Նրա խոսքով` այդպես են կարծում այն մասնագետները, որոնք համապատասխան հետազոտություններ են անցկացնում։
Թռչնասերների կենտրոնի ղեկավարը նշեց, որ իրենց գլխավոր խնդիրն է հասցնել իշխանություններին, որ կենդանական աշխարհի համար պետք է գոյության համար անհրաժեշտ պայմաններ ստեղծել, քանի որ դրանցից շատերը փոխում են իրենց կենսակերպը կլիմայական փոփոխությունների պատճառով։ Ադամյանի խոսքով` վառ օրինակն արագիլներն են։
Ադամյանը նշեց, որ կենդանիների, ինչպես նաև մարդկանց վրա ազդում է այն ամենը, ինչ մենք տեսնում ենք այսօր. տիեզերքում տեղի ունեցող գործընթացներից մինչև տանիքների վրա տեղադրված ալեհավաքներ և Wi-Fi սարքեր։
Ամուլսարի հանքավայրը գտնվում է ՀՀ Վայոց Ձորի և Սյունիքի մարզերի սահմանագլխին, Զանգեզուրի լեռնաշղթայի հյուսիս, հյուսիսարևմտյան ճյուղավորումների ջրբաժան մասում, 2500-2988 մ բացարձակ բարձրությունների վրա։ «Լիդիան Արմենիա» ընկերությունն իր ներկայացրած ծրագրում մեկ տոննա հանքանյութից ծրագրում է 0.7 գրամ ոսկի ստանալ՝ խոստանալով տարեկան 30 մլն դոլար վճարել պետական բյուջե։ Բնապահպանների համոզմամբ` սա չափազանց չնչին գին է Հայաստանի բնությանը սպառնացող վտանգի դիմաց։