Արմենուհի Մխոյան, Sputnik
Ամանորից առաջ Տախմինային, Դավթին ու Գյումրու Նանսենի անվան երեխաների խնամքի տան ևս 28 սանի առաջարկել են նկարել իրենց երազած խաղալիքը՝ «Մի խաղալիքի պատմություն» ծրագրի շրջանակում:
Ոչ մեկին, նույնիսկ խնամքի կենտրոնի տնօրինությանը չեն ասել, որ նախատեսվում է նաև ծրագրի երկրորդ փուլ իրականացնել, և բոլորի համար անակնկալ է եղել, երբ երեխաների նկարած պատկերները խաղալիքների են վերածվել։
Երազանքները թղթին հանձնած ու կենդանի շունչ ստացած խաղալիքները` որպես հիշատակ, այսօր հանձնեցին երեխաների խնամքի տան սաներին:
Այս կենտրոնի սաները հիմնականում միակողմանի ծնողազուրկ կամ սոցիալապես անապահով երեխաներ են, որոնք նմանատիպ հրաշքների կարիքը շատ են զգում:
Սաներից մեկն էլ 15 տարեկան Դավիթն է, որն արդեն 5 տարի հաճախում է այս կենտրոն, սիրում է նկարել, բայց նկարելուց ավելի շատ ուզում է լավ սուսերամարտիկ դառնալ: Նա սուսերամարտում առաջին քայլերն է անում, հայրենի քաղաքում իր հասակակիցների մեջ կայացած մրցույթում երրորդ տեղն է նվաճել, բայց դա նրա համար դեռ վերջնագիծ չէ: Դավթի բոլոր նկարներում գերակշռում է սուսերամարտը:
Հենց նրա «Սուսերամարտիկն» էլ դարձավ ծրագրի խորհրդանիշը:
Տախմինան 13 տարեկան է: Ճակատագրի բերումով արդեն 4-րդ տարին է` Գյումրու Նանսենի անվան երեխաների խնամքի տան սաներից է: Ընտանեկան որոշակի խնդիրների պատճառով օրվա մի մասը հանրակրթական դպրոցում է անցկացնում, իսկ հետո` խնամքի տանը: Երազում է պարուհի դառնալ: Ինչպես հասակակից աղջիկներից շատերը, այնպես էլ Տախմինան արջուկ շատ է սիրում: Անկեղծանում է. «Շատ ունեմ նման արջուկներ, բայց, միևնույն է, շատ եմ սիրում»: Նրա նկարած արջուկը նույնպես խաղալիքի է վերածվել։
Սերունդների համերաշխություն երիտասարդական հասարակական կազմակերպության և Գյումրու Երիտասարդական պալատի իրականացրած ծրագիրը կյանքի է կոչվել ՀՀ մշակույթի նախարարության աջակցությամբ: