ԵՐԵՎԱՆ, 18 հունվարի — Sputnik. Հունվարի 22-26-ը Ստրասբուրգում կկայանա Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանը։ ԵԽԽՎ աշխատանքներին կմասնակցի նաև ՀՀ նախագահ Սերժ Սարգսյանը։
Ըստ ԵԽԽՎ պաշտոնական կայքում հրապարակված օրակարգի` հունվարի 24-ին Սերժ Սարգսյանը հանդես կգա ելույթով։
ՀՀ նախագահի ելույթը նախատեսված է տեղական ժամանակով ժամը 12:00 — 13:00-ը, որից առաջին 20 րոպեն կհատկացվի ելույթին, 40-ը` հարց ու պատասխանին։
Սերժ Սարգսյանից բացի, ԵԽԽՎ նստաշրջանում նախատեսված են Ավստրիայի նախագահի, Դանիայի վարչապետի, Դանիայի թագաժառանգ արքայադստեր ելույթները:
Նստաշրջանի ընթացքում կընտրվեն ԵԽԽՎ նոր նախագահը, մարդու իրավունքների հարցով նոր հանձնակատարն ու Մարդու իրավունքների եվրոպական դատարանի դատավորը:
Օրակարգում ներառված թեմաներից են Ուկրաինայում զինված հակամարտության մարդասիրական հետևանքները, իսրայելա-պաղեստինյան հակամարտության խաղաղ կարգավորման գործընթացը, Եվրոպայում աճող հակասեմականության, իսլամատյացության ու այլատյացության խնդիրները, ինչպես նաև ժամանակակից սպորտի, մասնավորապես` ֆուտբոլի կառավարման խնդիրները: