ԵՐԵՎԱՆ, 18 հունվարի — Sputnik. Հայաստանի տեխնոլոգիական ներուժը հնարավոր է և պետք է ծառայեցնել հայկական բանակին, այդ ուղղությամբ որոշակի առաջընթաց կա, Sputnik Արմենիայի հետ զրույցում ասաց ԻՏՁՄ (UITE) գործադիր տնօրեն Կարեն Վարդանյանը։
Ըստ նրա` գործընթացը, սակայն, դանդաղ է ընթանում, ինչը բավարար չէ կոնկրետ խնդիրների լուծման համար։
«Ինչ-որ բան արվում է, բայց չկա որևէ ինստիտուցիոնալ, հիմնական բան։ Քանի դեռ չի ստեղծվել ինստիտուտների համալիր, որը հայկական բանակին ժամանակակից տեխնոլոգիաներ կմատակարարի ու կմասնակցի բանակի արդիականացմանը, իրական առաջընթացի մասին խոսք անգամ լինել չի կարող», — ասաց Վարդանյանը։
Նա նշեց, որ հայկական բանակին այսօր նախևառաջ գիտական, գիտահետազոտական բնույթի աջակցությունն է պակասում. այն պետք է իրականացնեն երկրի բուհերը։ UITE-ի ղեկավարը համոզված է, որ Հայաստանի Ազգային Պոլիտեխնիկական Համալսարանը պետք է առաջնային դեր խաղա բուհերի և պաշտպանական համալիրի համագործակցության հարցում։
Վարդանյանն օրինակ բերեց Փարիզի Պոլիտեխնիկական ինստիտուտը, որը հիմնադրման օրվանից գործում է որպես ռազմական գիտահետազոտական կրթական հաստատություն։
«Ընդհանրապես «պոլիտեխնիկ» հասկացությունը նշանակում է ռազմատեխնիկական բուհ։ Սակայն մեզ մոտ այդ ամենը բիզնեսի է վերածվել, որը, սակայն, վատ արդյունքներ է ցուցադրում, կրթության որակը կաղում է։ Մենք առաջարկում ենք միավորել բանակի և «պոլիտեխնիկի» ջանքերը», — ավելացրեց Sputnik Արմենիայի զրուցակիցը։
Կարեն Վարդանյանը գերադասեց չխոսել մանրամասների մասին` ընդգծելով թեմայի «նրբությունը»։ Այնուամենայնիվ, փորձագետը նշեց, որ հայ մասնագետներին առաջարկել են ծրագիր մշակել, ըստ որի` բանակի խնդիրները կներառվեն բուհերի կրթական համակարգում` սկսած առաջին կուրսից։
«Ուսանողները կարող էին ծառայել բանակում և միաժամանակ սովորել բուհում` տարեկան 4-6 ամիս տրամադրելով բանակի համար կարևոր հարցերի ուսումնասիրմանն ու դրանց լուծումների մշակմանը», — նշեց փորձագետը։
Կարեն Վարդանյանի խոսքով` անկախ նրանից` կիրականանա արդյոք ՏՏ ոլորտի մասնագետների գաղափարը, թե ոչ, ռազմական և կրթական ոլորտների միաձուլումը թույլ կտա Հայաստանում կարգավորել առաջատար ռազմական տեխնոլոգիաների մշակումն ու արտադրությունը, որոնք տեղի զորավարժարաններում փորձարկվելուց հետո հնարավոր կլինի արտահանել։