ԵՐԵՎԱՆ, 18 հունվարի – Sputnik. Հայաստանի ընդդիմության գործունեության ձախողման պատճառը դրա ներկայացուցիչների ինքնասիրահարվածությունն է, Sputnik Արմենիա մամուլի կենտրոնում ասաց նախկին պատգամավոր Ռուբեն Հակոբյանը։
«Ե՛վ ընդդիմությունը, և՛ իշխանությունը նույն կանոններով են խաղում։ Յուրաքանչյուրը կարծում է, որ նա միակն է, լավագույնն ու անկաշառը։ Այդ նարցիսիզմը բացասականորեն է ազդում քաղաքական դաշտի վրա, պառակտում է ընդդիմությունը, ինչից և օգտվում են իշխանությունները», –ասաց Հակոբյանը։
Նրա խոսքով` այդպիսով իշխանությունը ընդդիմության ֆոնին ավելի լավն է երևում։ Հակոբյանը նաև խորհուրդ տվեց ընդդիմությանը չմեղադրել ժողովրդին, որ այն նրան չի հետևում ու ձայն չի տալիս։
Նա չի հավատում «Ելք» դաշինքի նախաձեռնած գնաճի դեմ ուղղված քայլերթի անկեղծությանը։ Եթե մարդկանց օգնելու հարց լիներ, նրա կարծիքով, դաշինքի հիմնական նպատակը կլիներ ամբողջ քաղաքական դաշտը միավորելը։
«Մինչ հայտարարություն անելը պետք է հանդիպումներ անցկացվեին այլ կուսակցությունների ներկայացուցիչների, քաղաքական անձանց հետ։ Պետք էր միավորել հասարակությանը», – ասաց Հակոբյանը։
Այդ քայլը զուտ գովազդային է, հենց դա խանգարում է ընդդիմադիրներին միավորվել։ Բացի այդ` նա կարծում է, որ գնաճի դեմ ուղղված քայլերթը ավելի շատ հասարակական կազմակերպության, քան կուսակցության օրակարգ է։
Հայտարարություններ են հնչում` ով չի միանում քայլերթին, համաձայն է գնաճի հետ։
«Դա շանտաժ է։ Հիմնական խնդիրն այն է, որ ընդդիմության թվում է, եթե ժողովուրդը դժգոհ է իշխանությունից, ապա իր կողքին կլինի։ Ոչ, պետք ավելի համոզիչ լինել», – կարծում է Հակոբյանը։
Ասուլիսի մյուս բանախոսը` քաղտեխնոլոգ Կարեն Քոչարյանը, կարծում է, որ հասարակության մեջ կարծիք կա, թե ապրիլի 9–ին (երբ նոր նախագահը կստանձնի իր լիազորությունները – խմբ.) ներքին քաղաքական կյանքում ամեն ինչ կավարտվի։
«Կարծում եմ` ամեն ինչ նոր է սկսվում. նոր քաղաքական շրջանը կտևի մինչև 2022 թվականը։ Ընդդիմությունը նոր պետք է հաստատվի, ֆիքսի իր տեղը», – ասաց Քոչարյանը։
Նա նշեց, որ կարոր չէ` ովքեր կգրավեն երկրի կարորագույն պաշտոնները, միևնույնն է նրանք ՀՀԿ–ի թեկնածուներն է լինելու։
«Նա չի լինելու ընդդիմությունից, օդից, Մարսից։ Հանրապետական կուսակցությունը հաղթել է ընտրություններում, նա էլ որոշելու է։ Նույնիսկ եթե Գալուստ Սահակյանը վարչապետ լինի, ի՞նչ կփոխվի», – ասաց Քոչարյանը։
Նրա կարծիքով` քաղաքական դաշտն ու ԶԼՄ–ները մանրուքների հետևից են ընկած, իսկ կարևոր բաները անտեսվում են։
Հունվարի 19–ին կկայանա «Ելք» դաշինքի գնաճի դեմ քայլերթը։ Վերջին ամիսների ընթացքում Հայաստանում կտրուկ աճել են առաջին անհրաժեշտության ապրանքների գները։ Խմբակցության ղեկավար Նիկոլ Փաշինյանը հրավիրել է թանկացումներից դժգոհ բոլոր մարդկանց մասնակցել բողոքի ակցիային։