Ռուսաստանցիները Հայաստանին ավելի շատ են վստահում, քան Վրաստանին ու Ադրբեջանին

ԵՐԵՎԱՆ, 17 հունվարի — Sputnik. Հայաստանն ընդգրկված է ԱՊՀ երկրների եռյակում, որին ռուսաստանցիներն ավելի շատ են վստահում։ Այդ են վկայում «Ռամբլեր» պորտալի վերլուծական ծառայության հարցման արդյունքները։

«Ռուսաստանցիների մեծ մասը (50%) Բելառուսին ավելի շատ են վստահում, քան հետխորհրդային տարածքի ցանկացած այլ երկրի։ Ռուսաստանի քաղաքացիների վստահությանն արժանացած երկրորդ երկիրը Ղազախստանն է (17%), երրորդը` Հայաստանը (13%)։ Նախկին ԽՍՀՄ-ի մյուս բոլոր պետությունները հարցման արդյունքում ձայների 10%-ից պակաս են հավաքել», — գրված է հաղորդագրության մեջ։

Միևնույն ժամանակ նշվում է, որ ռուսաստանցիները վստահում են Ուկրաինային (5%)։ 3% է հավաքել Ղրղըզստանը, 2-ական տոկոս` Ադրբեջանը, Լիտվան, Ուզբեկստանն ու Էստոնիան, 1-ական տոկոս` Վրաստանը, Լատվիան, Տաջիկստանն ու Թուրքմենիան, իսկ Մոլդովան նույնիսկ մեկ տոկոս չի հավաքել։

Հարցմանը մասնակցել են 1419 մարդ։